Liv og røre på Jonatunet: – Endeleg er me i gang!

– Me har det gøy. Eg har litt heimlengsel, men det går fint, seier Amalie Nappen Toft.

13-åringen er ein av 82 elevar ved Sveio skule, som deltek på leirskule i regi av Hardangerakademiet denne veka. Ho og veninna Tyra Svensbø Wistrøm var ferdige med rappellering og rollespel då det nærma seg lunsj tysdag.

Dei to veninnene fortel at dei tykkjer det er moro å vera på besøk i Hardanger. Jondal er ein fin og koseleg stad, slår dei fast.

Natt til tysdag sov dei i lavvo. Det gjekk fint, seier jentene. Dei komande nettene skal dei sova på eitt av dei 25 soveromma på Jonatunet, der leirarrangøren held til.

Det fyrste døgeret har gått fint, fortel Tyra. Sjølv om aktivitetane til no har falle i smak, er «fritida» på kvelden aller kjekkast.

– Det er moro når me kan styra sjølve kva me vil gjera på kvelden, seier ho.

Etter ein felles matpause venta det opplegg i regi av FN-sambandet, som var på dagsbesøk frå Bergen, og padling i kano. Trass litt heimlengsel gler jentene seg til resten av opphaldet, fortel dei.

– Over all forventing!

Ida Sørheim er dagleg leiar for Hardangerakademiet. Ifylgje henne har starten på leirskuleveka vore god.

– Det er ei gruppe med kjekke elevar og kjekke lærarar. Det har gått over all forventing, seier Sørheim.

Ho og kollegaene tok imot gruppa med åttandeklassingar og kring ti lærarar frå Sveio tysdag. På framkomstdagen var målet at elevane skulle gjera seg kjende både på huset og i nærområdet. I tillegg vart det ein del informasjon om kva som venta av oppgåver og aktivitetar, forklarar Sørheim.

Onsdag var elevane delte i fire grupper. Medan Sørheim tok seg av dei som padla, hadde Kristian Flo ansvar mellom anna for dei som rappellerte. Ifylgje han hadde dei fyrste to gruppene klara seg godt, men nokre hadde truleg fått kjenna litt på høgdeskrekken.

På Jonatunet er det soveplassar til kring seksti gjester. Sidan Sveio skule ynskte at heile trinnet skulle reisa samla, vart det difor naudsynt med ei ordning der klassane må rullera på å sova i lavvo. Løysinga vart godt motteken av skulen, fortel Flo, og viser til at utandørs overnatting er eit av kompetansemåla til ungdomsskuleelevane.

Steg for steg

Satsingsområda til akademiet er fred og konfliktløysing, berekraftig utvikling og klima og miljø. Opplegget for leirskulen er tett knytt opp til desse, forklarar Flo.

– Leirskule er ikkje noko som skal gå føre seg i eit klasserom. Ein skal vera i naturen og læra der. Me ynskjer at elevane skal verta glade i naturen, og at dei skal ynskja å ta vare på han. Difor er uteskulepedagogikk viktig, seier han.

Store grupper og mange aktivitetar kan skapa enkelte utfordringar, spesielt når det gjeld logistikk. Men både Sørheim og Flo understrekar at alt har gått på skjener til no.

– Me tek det steg for steg, minutt for minutt, seier Flo.

Sjølv om leirskulebesøket i mai er det aller fyrste i rekkja, har dei tilsette i akademiet gjort seg nokre erfaringar. I fjor sommar tok dei imot fleire familiar, fordelte på tre veker, då Raudekrossen arrangerte «Ferie for alle», som er eit gratistilbod til familiar som strevar økonomisk, og som ikkje har råd til å ta med borna på ferie.

– Erfaringane me hausta i fjor, har me fått god nytte av. Det går betre og betre for kvar gong, seier Flo.

Draum om heilårsleirskule

Kring ti tilsette er i sving i løpet av den vesle leirskuleveka, som starta tysdag og sluttar fredag. Per Eikeland, som har vore ein ressursperson for Hardangerakademiet og pådrivar for leirskulen, rosar gjengen for innsatsen deira.

– Det har starta godt. No er me endeleg i gang! seier han.

Eikeland er ikkje redd for å tenkja stort. Heilårsleirskule med god kvalitet og beste leirskule i løpet av fem år er måla, fastslår han.