– Lite potensial for funn
Dialog med og omsyn til friluftsinteresser i anleggsperioden, og god skilting av nye stiar, er viktig.
Det skriv Vestland fylkeskommune i ein høyringsuttale om detaljplanen for ny dam ved Bjølsegrøvatnet. Statkraft Energi AS planlegg å erstatta den eksisterande dammen. Arbeidet omfattar bygging av ny dam i betong, og naudsynte vegar og tunnelar for tilkome til dammen.
Tiltaket ligg i det fylkeskommunen omtalar som eit mykje nytta utfartsområde. I fråsegna peikar fylkeskommunen på at det ikkje er kjende automatisk freda kulturminne i området, og at det er lite potensial for funn i område med inngrep.
Det er elles avgjerande å sikra at det ikkje vert avrenning frå byggjeområda til vassdrag i området, står det i fråsegna.
Kvam herad drøfta eit høyringsinnspel om utbygginga tidlegare i juni. Dei folkevalde meiner at ålmenta må få tilgang til vegen opp etter at prosjektet er ferdig.
HF gjer merksam på at redaktør Sigbjørn Linga eig ein fritidsbustad ved Bjølsegrøvatnet. Red.
