– Lite gjev meir kvalitet til eit liv enn det å bidra til at andre får eit betre liv
I 26 år har Grannehjelpa limt kvemmingar saman. – Ein hjørnestein i samfunnet, meiner ordføraren.
Ordførar Torgeir Næss hadde funne fram ordførarkjeda til den utsette 25-årsjubileumsfesten i Norheimsund idrettshall laurdag. I talen til jubilanten sa han at særleg dei to siste åra vitnar om kva som bur i frivilligsentralen i Kvam.
– Mykje måtte skalerast ned. Mange av dei engasjerte folka i Grannehjelpa var sjølve i risikogruppa, og det same var mange av brukarane. Kva gjer ein då? De sette i gang telefonvenprosjektet og var med på utkøyring av mat, sa han.
I tillegg etablerte Grannehjelpa nyvinninga Torefjell, ein digital møtestad som har lokka nye brukarar til digitale verktøy for å ta del i ymse føredrag.
– De undervurderer ikkje brukarane dykkar – de oppvurderer dei og bidreg til å utvida horisonten deira og oppgradera dei. Dette er viktig på alle måtar – det er folkeopplysing og det motverkar einsemd, sa Næss.
– Mykje god vilje
Han meiner Grannehjelpa ser hindera, men også korleis ein kjem seg forbi dei ved å skapa noko nytt og betre. Nøkkelord i arbeidet er fellesskap og livsglede. Grannehjelpa gjer livet til både lag og enkeltpersonar rikare, meiner han.
– For det er lite som gjev meir kvalitet til eit liv enn det å bidra til at andre får eit betre liv, sa han.
Dagleg leiar Gunn Hilde Øymo, som overtok etter Sidsel Haugen i fjor, konstaterte at det ikkje er vanskeleg å spørja folk om hjelp i Kvam.
– Det er så mykje god vilje i frivilligheita. Det er heilt enormt kor stor verdi det har, sa ho.
Øymo og styreleiar Kari Mostad, sjølv tidlegare dagleg leiar, tok imot ei blomehelsing og eit bilete laga av Lina Valland Lyngset.
Sette tonen
Jubileet vart markert med om lag 130 gjester til bords i ein festpynta idrettshall. Mellom festtalar, song og prisutdeling (sjå eigen artikkel) åt gjestene både middag og festkake.
Fleire heldt talar. Sosionom Kristin Andresen Soldal, med brei bakgrunn frå frivillig sektor og ikkje minst støttekontakttenestene, snakka om verdien av frivillig arbeid. Ho meiner alle kan vera ein ressurs og at det er ei stor gåve å stilla opp for andre. Frivilligsentralane, ikkje minst Grannehjelpa, har vore ein stor norsk suksess, konstaterte ho.
– Å lesa årsrapporten til Grannehjelpa er til å verta i godt humør av. Det er heilt ufatteleg kor mykje de driv med, sa ho.
Hamdi Abdisamad Mohamud orienterte om prosjektet Bygdemødre i Kvam. Til sist var det gruppearbeid med både digitale og analoge hjelpemiddel som resulterte i nyttige innspel i det vidare arbeidet med frivillig innsats.
