Lingalaks får vitjing
Lingalaks AS er mellom eit dusin oppdrettarar som kan rekna med ein såkalla systemrevisjon i år.
Verksemda er nemleg på lista frå Mattilsynet med oppdrettarar som kan rekna med tilsyn i form av ein slik revisjon i 2025. Det same er Erko Seafood AS, som har oppdrettsanlegg i Jondal, og Alsaker Fjordbruk AS, som har verksemd i Ålvik.
Temaet for systemrevisjonane vil i hovudsak vera dyrevelferd under luseoperasjonar, biotryggleik og velferd hjå reinsefisk, opplyser Mattilsynet i ei pressemelding.
– Me meiner at betring på systemnivå betyr betring for flest mogeleg dyr, seier direktør Bård Skjelstad i Mattilsynet.
Revisjonen av styringssystem og verktøy omfattar også verifikasjonstilsyn hjå 10–15 prosent av lokalitetane for å kontrollera om kartet stemmer med terrenget, og om overordna planar og system vert omsette til ein einskapleg praksis på merdkanten.
– Me ynskjer å vera tydelege og føreseielege, slik at dei som skal ha revisjon, har mogelegheit til å setja i gang forbetringsarbeid før me startar revisjonsløpet. Eit viktig mål er å bidra til felles læring i næringa, seier Skjelstad i pressemeldinga.
Utvalet av selskap er basert på storleik, kvalitative vurderingar og røynsler frå tidlegare revisjonar og tilsyn, attåt hendingar og dokumentert mortalitet.
Oppsummeringa av det fyrste året med systemrevisjonar synte mellom anna stort sprik i kor godt selskapa tolkar reglar. Fleire funn gjekk att hjå fleire oppdrettarar, ifylgje Mattilsynet.
