Lingalaks AS får ny dagleg leiar
Nina Møgster frå Austevoll tek over for Erlend Haugarvoll som dagleg leiar i Lingalaks AS.
Møgster byrjar i stillinga 1. august. Ho kjem frå jobben som dagleg leiar i Lerøy Sjøtroll. Ho er fiskerikandidat frå Noregs Fiskerihøgskule i Tromsø og har ei mastergrad frå Norges Handelshøyskole.
– Lingalaks er eit spanande selskap som har levert gode biologiske prestasjonar over tid. Eg gler meg til å verta betre kjend med folka og verksemda, seier Møgster.
Austevollingen fortel at ho er oppteken av berekraftig havbruk, og at ho ynskjer å bidra til å byggja opp eit robust selskap som kan stå seg gjennom framtidige endringar i både rammevilkår og marknadsendringar.
– I ei tid med stadig skiftande rammevilkår må ein jobba for å tilpassa seg endringane. Det er viktig at verksemda skal klara seg gjennom både gode og dårlege tider, seier ho.
Møgster fortel at ho vil jobba for at Vestlandet skal ta større del i framtidig vekst i havbruksnæringa. Ho viser mellom anna til dei nye nordiske kostråda som vart lagde fram tysdag.
– Det å produsera meir sunn mat til verda og bidra til at folk et meir fisk, er ei viktig oppgåve, seier austevollingen.
Erlend Haugarvoll har vore dagleg leiar i Lingalaks sidan i fjor vår, etter at Kristian Botnen slutta i stillinga. Han er også eigar av og styreleiar i eigarkonsernet Rolv Haugarvoll AS. Han seier at han er svært glad for at Møgster tek over stillinga.
Haugarvoll vonar at han no vil få meir tid til utvikling av konsernet, i tillegg til å arbeida med interne og eksterne fiskevelferds- og miljøprosjekt. Det går fram i eit presseskriv.
– Me har fleire spanande utviklingsprosjekt på gang, mellom anna Stadion Laks, ei løysing for lukka anlegg i sjø, som nærmar seg investeringsvedtak. I tillegg vonar eg å kunna engasjera meg tyngre i prosjekt som «Frå raudt til grønt» og «Reinare, rikare fjord og vassdrag i Hardanger», seier han i pressemeldinga.
