– Ligg an til rekord

Reiselivet i Hardanger hadde nemleg ein vekst på 8 prosent i perioden januar–september samanlikna med same periode i 2019.

Det opplyste Andreas Skogseth i eit innlegg på Hardangerkonferansen på Brakanes Hotel i Ulvik 8. november. Han er leiar for destinasjonsselskapet Visit Hardangerfjord AS. Selskapet spesialiserer seg på marknadsføring av regionen.

2023 ligg an til å verta eit rekordår for reiselivsnæringa i Hardanger, fortel Skogseth. Næringa omset for om lag 1,3 milliardar kroner i året, ifylgje tal frå konsulentselskapet Menon Economics AS som Skogseth presenterte.

Retta mot utlandet

Reiselivet i Hardanger er svært eksportretta, med om lag 50 prosent utanlandske gjester, opplyste Skogseth til hardingane. Talet på kommersielle overnattingar er om lag 800.000, og over 90 prosent er i ferie- og fritidssegmentet. 1.200 personar er direkte sysselsette i reiselivsnæringa i Hardanger.

Næringa skapar lokale arbeidsplassar. Reiselivet og besøket er essensielt for å skapa bulyst og for at det skal skje nok etter arbeidstid til at det er økonomi i å halda ope, hevdar Skogseth.

Talet på hytte- og campingovernattingar auka klart mest i Hardanger i år, og utgjer 59 prosent av marknaden, ifylgje ei gransking gjord av Visit Hardangerfjord. Ullensvang kommune størst vekst i talet på kommersielle overnattingar av hardangerkommunane frå januar til september 2023.

Dei tre største nasjonalitetane i marknaden er Noreg, Tyskland og Nederland. Det er forventa at asiatane vil koma tilbake i 2024, om enn ikkje for fullt. Interessa for Hardanger aukar i Europa og USA, opplyser Skogseth.

Nordmenn bruka i år i gjennomsnitt 2.755 kroner per døger i Hardanger. For utlendingane var talet 2.010 kroner, syner statistikken hans.

Halvparten av dei utanlandske feriereisande har vore i Noreg tidlegare. Av dei som kjem til Noreg for fyrste gong, er flest spanjolar. Halvparten av både dei norske og dei utanlandske turistane overnattar på hotell eller pensjonat.

Mange vitjar nettstad

Ein fjerdedel av norske turistar overnattar hjå familie, vener eller kjenningar, mot ti prosent av utlendingane. Dei fleste av dei reisande er nøgde med til dømes sørvis, maten og at det er lett å finna ut kva ein kan gjera og oppleva, viser undersøkinga.

64 prosent av dei utanlandske turistane, mot 37 prosent av nordmennene, kom for å oppleva fjordane, ifylgje statistikken til Skogseth.

Nettstaden hardangerfjord.com har hatt ein auke frå 400.000 til over éin million sidevisingar frå 2019, fortalde direktøren. Flest brukarar kjem frå Noreg, Tyskland og USA.

Om ein investerer i nettstadutvikling, søkjemotoroptimalisering og i det å gjera nettstaden meir synleg, vil det gje konkrete resultat, opplyste Skogseth.