Ligg an til om lag same besøkstal som i fjor
Hardangerbadet vil få om lag 40.000 besøkjande i år dersom andre halvår vert om lag som det fyrste.
Etter dei 6 fyrste månadene i år var 19.959 gjester registrerte, syner besøksstatistikken som Hardangerbadet AS sende til Kvam herad nyleg.
2022 opna med stengde dører i to veker på grunn av nasjonale koronatiltak, noko som speglar seg i statistikken for årets fyrste månad. Sidan 14. januar har det derimot vore fritt fram for dei badeglade.
Den beste månaden så langt i år var mars, då 4.398 vitja anlegget i Øystese. Likevel kan ikkje det fyrste kvartalet måla seg mot dei fyrste månadene etter at anlegget opna i desember 2019. I 2020 var 17.371 innom i dei 3 fyrste månadene, mot 10.306 i år. Også i 2020 var anlegget koronastengt i eit par veker i perioden.
Totalt vitja 49.593 bassenga i det fyrste heile driftsåret, då anlegget var stengt i om lag tre månader etter koronautbrotet i mars. I fjor vart 39.036 gjester registrerte.
Statistikken fortel at 14.787 av dei 19.959 kundane – eller 74 prosent av kundane – til og med juni i år løyste enkeltbillett. Anlegget hadde ved utgangen av juni 792 medlemer som stod for resten av besøka. På det meste, i desember 2020, hadde anlegget 1.079 medlemer.
Besøksstatistikken frå det private selskapet er eit krav heradsstyret har stilt i samband med løyving av kommunale tilskot til underskotsdekning. Då det førebels siste tilskotet vart løyvt i vår, kravde dei folkevalde at statistikken ikkje berre skal visa talet på besøkjande, men også fordelinga mellom kundar med medlemskap og andre kundar.
