Leverte mindre mjølk i 2019

Mjølkekua på Kaldestad hadde i fjor eit resultat før skatt på 19,7 millionar kroner eller 13,5 prosent av driftsinntektene på 146 millionar kroner. Etter skatt var resultatet 10,2 millionar kroner. I fjor var resultatet etter skatt 12,6 millionar og utbytet 8,5 millionar kroner.

Omsetninga var 3 millionar lågare enn i 2018, ifølgje årsmeldinga som følgje av mindre nedbør og lågare produksjon.

Harde fakta

Kraftproduksjonen fekk i fjor eit driftsresultat på 11,8 millionar kroner, som er 3,8 millionar kronar mindre enn året før, som følgje av produksjonsnedgangen. Kraftverket produserte sjølv i alt 43,5 gigawattimar (GWh) i fjor, som er 11,5 under tiårsmiddeltalet og monaleg mindre enn i dei tre føregåande åra.

Kraftverket formidlar mykje kraft i tillegg til den eigenproduserte. Kraftomsetninga åleine hadde eit driftsresultat på 2,8 millionar kroner, monaleg betre enn året før. Årsaka er meir stabile prisar. Nettdrifta fekk eit dårlegare resultat enn i 2018, 3,4 millionar, som følgje av mellom anna fleire arbeidstimar.

Kraftverket har slite med å få lønsemd i drifta av fibernettet, og lukkast heller ikkje i fjor. Eit negativt resultat på 0,2 millionar kroner er likevel monaleg betre enn året før. Styret forklarar at omleggingar knytte til ulike vegprosjekt fører til høge driftskostnader.

Kraftverket driv Sekkelva Kraftverk i Fyksesund. Som følgje av nedskriving på 1,6 millionar kroner — verdien er vurdert på nytt — får kraftverket eit om lag like stort negativt resultat. Kraftverket produserte 1,2 GWh i fjor.

Stor utbygging

Bygginga av Skulafossen kraftstasjon, med ei ramme på 47,5 millionar kroner, var det største prosjektet til kraftverket i fjor. Arbeidet har gått etter planen, den gamle stasjonen har produsert kraft parallelt med oppføringa av den nye, fram til han vart kopla ut 12. juni. Slik har ein sloppe store tap av inntekter. Den nye stasjonen skal koma i drift etter sommaren.

Røyrgata skal rivast. Styret har ikkje teke stilling til kva som skal skje med den gamle kraftstasjonen, opplyste administrerande direktør Arne Tillung i generalforsamlinga 16. juni.

— Me kan ikkje berre ha bygget ståande utan å gjera noko med det, sa han.

Dei gamle maskinene i bygget vert truleg ikkje bruka meir, men kan ha ein verdi av di det er mykje kopar i dei, påpeika Tillung.

Ymse aktivitet

Ifølgje årsmeldinga var 2019 det fyrste heile året med automatiske straummålarar. Røynslene så langt er god. Målarane sparar dei tilsette for mykje arbeid med særleg avrekning. Kraftverket håpar å installera målarar i år hjå dei som har søkt om fritak eller har nekta å byta.

Kraftverket hadde ved slutten av fjoråret 251 kilometer høgspentnett, 401 fordelingstransformatorar og 654 kilometer lågspentnett.

I 2019 var det ingen alvorlege hendingar, men fleire feil som førte til utfall. Heile Kvam utanom Ålvik mista straumen to gonger i juni då innbyggjarane vart forsynte av Bjølvo kraftverk i Ålvik som følgje av ein feil i Statnett-transformatoren i Børdalen. Feil i kraftstasjonen i Ålvik førte til utfalla.

Ved årsskiftet var 31 fast tilsette i verksemda. Berre tre av dei var kvinner. Sjukefråværet i fjor var 5,9 prosent.

Over til konsern

Pengane frå den kommunalt åtte mjølkekua kjem no frå det nye morselskapet Kvam Energi, ettersom kraftverket i fjor gjennomførte det som skal til for å stetta krava frå styresmaktene i den reviderte energilova om såkalla selskapsmessig skilje.

— Året har vore prega av formalia, protokollar, dokument, kontakt med revisor og handtering av prosessen. No er strukturen etablert, fortalde styreleiar Gunnar Skeie i generalforsamlinga 16. juni.

Den nye organiseringa galdt frå sist årsskifte reint rekneskapsmessig, og frå i vår selskapsmessig. Endringane inneber at kraftproduksjonen og nettdrifta er skilde og går føre seg i to ulike selskap, høvesvis Kvam Kraftverk AS og Kvam Energi Nett AS.

Morselskapet deira i det nye konsernet er Kvam Energi, som er eigt av Kvam herad og vart skipa 27. september i fjor. Morselskapet skal yta fellestenester, til dømes administrasjon, rekneskap og informasjonsteknologi, til dei to døtrene. Overføringa av nettverksemda frå Kvam Kraftverk til Kvam Energi Nett skjer i år.

Koronakrisa

Som dei fleste andre har kraftverket vorte påverka av koronaviruset, som har ført til lågare kraftforbruk og overproduksjon som følgje av den låge aktiviteten i næringslivet.

Kraftverket har mellom anna hatt tilsette på heimekontor og separert dei tilsette med ulike oppmøtestader, i tillegg til å innføra ymse hygienetiltak.

— Me har klart å levera som me skal utetter. Det er veldig bra, sa administrerande direktør Arne Tillung i generalforsamlinga.

Han opplyste at kraftverket har fått få førespurnader frå personar og verksemder med betalingsutfordringar. I eigarmøtet 6. mai opplyste han at likviditeten til kraftverket kan verta pressa som følgje av låge kraftprisar.