Lét faklane brenna for Gaza
Plassen framfor Kunsthuset Kabuso var fylt med brennande faklar då LO Kvam inviterte til Gaza-markering.
Dei som møtte opp på markeringa, fekk høyra appellar frå ordførar Torgeir Næss, kunstnar Marie Skeie og fagforeiningsmann og Palestina-aktivist Jorge Dahl. Dei fekk også høyra eit dikt skrive og framført av Tonje Noréa Gauden, og to spesialskrivne songar framført av Stig Lundblad-Sandbakk og Katrine Helgheim Van Tulder.
– Gjer alt verre
Næss sa mellom anna at han tykkjer terrorhandlinga Hamas utsette Israel for 7. oktober, var avskyeleg. Like avskyeleg tykkjer han svaret til Israel har vore.
– Reaksjonen til Israel er meiningslaus fordi Israel har brukt verkemiddel som dette sidan staten vart oppretta. Det har aldri ført til anna enn meir ekstremisme på begge sider. Det er ingen grunn til å tru at familiane som opplever død og lemlesting, vert mindre hatefulle. Bombene til Israel gjødslar ekstremisme og hat som kan leva vidare i generasjonar. For kvar Hamas-terrorist som vert drepen, vil det veksa opp mange gonger så mange, sa Næss.
Skal det koma noko godt ut av krigen, må det vera at verda ser at ei tostatsløysing er den einaste løysinga, meiner Næss.
– Då må vestlege land, særleg USA, pressa Israel. Men akkurat no må massedrapa på uskuldige sivile stoppa, sa Næss.
– Ei katastrofe
Dahl kalla det som skjer i Gaza for ein katastrofe.
– Kvam herad er 617 kvadratkilometer stort. Gaza er 365 kvadratkilometer stort. I Kvam bur det mellom åtte og ni tusen innbyggjarar. I Gaza bur det 2,3 millionar innbyggjarar. Halvparten er born. 11.000–12.000 er til no drepne i Gaza. Det er fleire enn det er innbyggjarar i Kvam. Tusenvis er sakna i ruinane, og FN kunne nyleg fortelja at minst 27.000 menneske er hardt skadde, sa han.
– Eg tykkjer det er flott å sjå at det er godt frammøte på dette arrangementet og andre liknande arrangement. Engasjement er viktig. Det er folket som endrar politikken og dermed verda, sa han.
– Må visa kva me meiner
Julian Bucher var ein av dei som hadde teke turen til Øystese.
– Eg tykkjer det som skjer i Gaza, er heilt forferdeleg. Det er ikkje så mykje me kan gjera med det som skjer, men me må i alle fall visa kva me tykkjer, sa han.
Tone Solvang hadde teke med seg ein plakat med teksten «Fred, tryggleik og fridom». Plakaten var dekorert med ei fredsdue med ei olivengrein i nebbet.
Ho er glad for at det vert arrangert eit slikt arrangement i Kvam.
– Eg var litt redd for at det ikkje skulle koma eit slikt arrangement her. Eg set stor pris på at nokon har teke initiativet. Ein ser jo at det er mange som hadde lyst til å møta opp for å visa solidaritet både med offera i Gaza og offera for terrorangrepa i Israel, sa ho.
