– Lensepumpa har ikkje gått

Steinar Djupevåg eig båten som sokk.

– Det er uvisst kvifor han sokk, men det kan vera ein kombinasjon av dårleg vêr og at lensepumpa ikkje har gått, seier Djupevåg.

– Kan det ha noko å gjera med at hamna som bølgjedempar er borte?

– Nei, det er ikkje bølgjer der han låg. Så det har ingenting med det å gjera, seier båteigaren.

Brannvesenet fekk melding om at ein båt som låg fortøydd ved kai, hadde gått ned. Meldinga kom frå andre i området som såg ein lekkasje i sjøen i Skutevik. Det opplyser varabrannsjef Svein Valland Laupsa i Kvam brann og redning.

– Det vert rekna som akutt ureining. Vår oppgåve er då å reisa ut og sjå, og sørgja for at lekkasjen ikkje fer meir av garde enn han allereie har gjort, seier Laupsa.

Ifylgje Laupsa skal det lite lekkasje til før det vert synleg. Truleg er det diesel som viser på vassoverflata, seier Laupsa.

La ut lenser

Då mannskapet kom til staden, la dei lenser rundt båten for å avgrensa skadane. Nokre av lensene samlar opp litt av lekkasjen, medan andre absorberer lekkasjen, opplyser Laupsa. Etter ei viss tid, inntil ei veke, må dei skiftast ut, seier han.

Brannvesenet har vore i kontakt med båteigaren. Båteigaren må leggja fram ein plan for korleis han skal få båten opp og hindra meir skade på miljøet, seier Laupsa.

– Me fylgjer opp saka både munnleg og meir formelt, seier Laupsa.

– Ureinar betalar normalt

Han fortel at det i utgangspunktet er båteigaren som må ta rekninga for arbeidet.

– Forskrifta mot akutt ureining, som me jobbar etter, seier at den som er ansvarleg for ureininga, må dekkja kostnaden, seier Laupsa.

Han fortel at brannvesenet bidreg med å hindra utsleppet i akuttfasen, om eigaren ikkje er i stand eller har pengar til å gjera det.

– Me er inne i den fyrste fasen, og så kastar me ballen vidare til båteigaren. Ved behov hjelper me til. Det er ingen regel utan unntak, seier varabrannsjefen.

Torsdag skal båten hevast ved hjelp av kranbil.

– Far min og Jan Mo AS skal gjera jobben. Det er mykje vedlikehald som må takast opp igjen, så dette vert veldig mykje ekstra arbeid, seier Djupevåg.