Leitar framleis etter toppleiar – har utsett søknadsfristen
Det er ikkje lett å rekruttera til kommunale leiarstillingar, seier HR-sjef Kari Sagen i Kvam herad.
Kvam herad er på leit etter ny teknisk sjef etter at Lars Ese Ur sa opp i vår, etter ti år i jobben.
Søknadsfristen for stillinga gjekk ut 27. januar, men er utsett til 3. februar.
Fråverande hovudjegerar
Årsaka er ikkje mangel på søkarar, seier Kari Sagen, HR-sjef i Kvam, men forseinkingar som følge av sjukefråvær i rekrutteringsfirmaet heradet nyttar i søkeprosessen.
– Me skal ha eit møte i starten av februar der me går gjennom kandidatane, og håper å ha tilsett ny teknisk sjef i løpet av månaden, seier Sagen.
Når vedkommande kan byrja, er ho ikkje sikker på. Det avheng også av den eventuelle, noverande jobben til kandidaten. Men Sagen håper at den nye kommunalsjefen kan vere på plass før sommaren.
– Kan ikkje konkurrera
Sagen opplyser at det ikkje er lett for kommunar å rekruttera til leiarstillingar. Ho skildrar arbeidsmarknaden som stram.
– Me konkurrerer med den private marknaden, og kommunar er ikkje dei som betaler mest. Søkarane må vera motiverte av samfunnsansvaret, seier Sagen.
Og det er ikkje eit lite ansvarsområde ein teknisk sjef har. Det dekkjer heile det tekniske fagfeltet i heradet: forvalting, drift og vedlikehald av kommunale bygg, kommunalteknikk (veg, vatn, avløp, park og anlegg), reinhald og brann- og redningstenesta.
– Totalt har teknisk sjef rundt hundre tilsette under seg, seier Sagen.
Nils Eivind Stranden er konstituert teknisk sjef, og vil halda fram i stillinga til ein permanent sjef er tilsett.
