Leikeområde er så langt til ingen nytte

Det nye området med ballbinge, leikeapparat og sykkelskur mellom idrettshallen og Gamle Dalavegen er tilsynelatande nesten ferdig ved skulestart. Men rektor Linda Jondahl Haugland lèt ikkje elevane ta i bruk det nye leikeområdet før sikringa mot vegen er på plass.

Dersom det ikkje vert reist ei form for gjerde eller netting som hindrar ballane i å spretta ut i Gamle Dalavegen, vil ikkje rektoren tillata bruk av området.

– Vil ikkje ta over ballbinge

Bjarte Rasmussen i ABO Plan & Arkitektur AS er innleigd prosjektleiar for Kvam herad. Han fortel at heradet før sommaren gav beskjed om at sikringa av ballbingen ikkje var god nok. Veidekke Entreprenør AS har avtale med Vestland fylkeskommune om å byggja ut området saman med den nye vidaregåande skulen.

Opphavleg var ballbingen teikna inn som ein gatebasketballbane. Då var tryggleiksnett med i planane, ifylgje Rasmussen. I prosessen vart banen endra til ballbinge, og då skal sikringa ut mot vegen ha «forsvunne».

– Me vil ikkje ta over ballbingen før han er tilstrekkeleg sikra. Veidekke Entreprenør meiner at det kan løysast med fartshumpar og hjartesone rundt skulen. Dei meiner fartshumpar vil sørgja for at bilførarar klarar å stoppa i tide dersom born spring etter ein ball ut i vegen. Me meiner at Veidekke Entreprenør skal levera eit nøkkelferdig produkt med sikring, men der er dei ueinige, forklarer Rasmussen.

Jondahl seier at det var kring jul ho fekk vita at det ikkje var planlagt noka form for sikring langs ballbingen. Ho meiner det er stor risiko for at born kjem til å springa ut i vegen.

Ynske frå kommunen

Snart er det møte mellom byggherrane, og då vil Rasmussen på nytt ta opp problemstillinga knytt til ballbingen. HF har vore i kontakt med Veidekke Entreprenør, som viser til at Vestland fylkeskommune må svara for innhaldet i avtalen mellom partane.

Gunnar Ringheim er prosjektleiar i Vestland fylkeskommune. Han seier at det er Kvam herad som har ynskt, bestilt og betalt for å få ein ballbinge, i staden for det som opphavleg var prosjektert.

– Eg har ingen informasjon som seier noko om sikring, men me får tru Rasmussen veit meir om dette enn meg, seier Ringheim.

– Det ordnar seg

Han fortel at leikeplassen utanfor skulen er ein del av trinn 2 i utbygginga. Planane i trinn 1 skal ferdigstillast i år, medan det som står i trinn 2, skal vera klart til formell overtaking 1. oktober 2025. Ringheim seier at det har vore fremja ynske om å ta i bruk området før, og at alle partar har vore positive til det. Han presiserer at det i så fall vert eit unntak.

– Me har registrert ei bekymringsmelding om sikring av ballbingen, men det er ingen formell klage. Uansett er det ein grunn til ikkje å opna opp enno, seier Ringheim.

Ifølgje Ringheim er det manglande nettet ikkje noko lovbrot. Han seier at området vil stå med byggjegjerde rundt så lenge det ikkje er trygt nok.

– Me tek ikkje i bruk ein leikeplass når folk er bekymra for tryggleiken. Må det opp eit nett, så må det opp. Eg er trygg på at det ordnar seg. Det skal i alle fall vera i orden til me overtek, seier Ringheim, som forsikrar om at saka vil verta fylgd opp i byggherremøte.