Leik kan gje plassmangel

Det vert eit sentralt spørsmål når arbeidet med uteområdet ved skulen omsider kan nærma seg stadiet der noko vert gjort ute i felten. Saka vart drøfta av samarbeidsutvalet ved skulen i eit møte 1. oktober.

Utanom skuletida er skuleplassen mykje nytta som parkeringsareal. I møtereferatet vert det framheva at det trengst ein del parkeringsplassar når det finn stad store arrangement utanom skuletid til dømes i fleirbrukshallen, på fotballbanen eller i symjehallen. Parkering er ikkje del av prosjektet som gjeld uteområdet.

– Det bør leggjast ein overordna plan for parkering i Jondal der det er teke omsyn til det faktiske behovet, heiter det i referatet.

Prosjektleiar Øyvind Andersen i avdeling for prosjekt og utvikling i eining for teknikk og miljø i Ullensvang kommune opplyser til HF at parkeringssituasjonen har vore drøfta i prosjektgruppa og med lag i Jondal. Kommunen er klar over at parkeringsplassar trengst ved skulen, men konsulentane i Norconsult AS har frårådd å opna for biltrafikk i aktivitetsområdet.

Løysinga er at den eksisterande parkeringsplassen nær avkøyrsle til skuleområdet vert utvida med to plassar. I tillegg vert det arbeidd med å leggja til rette for eit område med kombinerte føremål, mellom desse parkering, inne på skuleplassen.

– Denne parkeringa vil ikkje bli tilgjengeleg i skuletida, men tanken er at ho kan nyttast ved arrangement som fører til auka parkeringsbehov. Det vil vera opp til skulen, i samarbeid med dei forskjellige laga i Jondal, korleis dei vil praktisera bruken av denne og i kva omfang dei ynskjer å nytta henne, skriv Andersen i ein e-post til HF.

I møtet i samarbeidsutvalet vart også kulturen for parkering og køyring ved skulen og barnehagen drøfta. Det er eit mål å få praksisen i meir ordna former, og temaet vert jamleg teke opp med foreldra.