Leigde ut omsorgsbustader på Airbnb

Det kjem fram i ein leigeavtale HF har fått innsyn i. I avtalen er det opplyst at leigetakaren har planar om å leiga ut dei sju leilegheitene via tenesta Airbnb.

Leigetakaren er selskapet Femtifemti AS. Dagleg leiar er Espen Nordset Raknes, som også eig og driv mellom anna Hallvardsnaustet. Systera Cecilie Nordset Raknes eig selskapet, og faren Helge Raknes er styremedlem.

– Det byrja med at me i fjor fekk ein del førespurnader om overnatting, pluss at Eikeneset òg hadde behov, seier Helge Raknes.

Strandebarmheimen og omsorgsbustadene hadde stått tomme lenge, og familien bestemte seg for å kontakta heradet. Heradet sa ja ganske med ein gong, fortel Raknes.

– Har ikkje finrekna

Å leiga éi av leilegheitene 30.–31. august hadde kosta deg 1.912 kroner, inkludert reingjeringsgebyr og tenestegebyr frå Airbnb. Leilegheitene skal med andre ord ikkje leigast ut mange netter for å dekkja husleiga på 5.000 kroner i månaden.

–Leigesummen må takast med ei klype salt, seier Stein Rykkje, leiar for forvalting, vedlikehald og drift i Kvam herad.

Han opplyser at Femtifemti har hatt utgifter med å måla opp leilegheitene innvendig, nytt dusjgarnityr og toalettsete, utbetring av kjøken, vask av leilegheiter og fellesareal, stell av uteområde og energikostnader. I tillegg må meirverdien av salsvinsten leggjast til, meiner Rykkje.

– Veit Kvam herad kva utgifter Femtifemti har hatt i samband med dette?

– Nei, det er uinteressant. Me veit kva me hadde måtta betala om me skulle hatt folk til dette, seier Rykkje.

– Kva berekningar gjorde heradet for å koma fram til leigesummen?

– Me gjorde ei «skjønsvurdering» og har ikkje finrekna på det. Me har vore einige på kvar vår side, seier Rykkje.

– Eit tapsprosjekt

Helge Raknes seier til HF at verksemda ikkje har tent pengar på prosjektet. Etterspurnaden har vore dårleg, og det går ikkje i pluss, seier han. Det trur han skuldast at leilegheitene kom for seint ut på marknaden, og at dei er lagde ut på «feil» side. Leilegheitene har lege ute på Airbnb og på visitstrandebarm.no, og burde heller ha lege ute på booking.com, meiner han.

– Kor mykje har de lagt ut?

– Eg kan tenkja meg at summen er om lag 120.000 kroner. Eg har gjort ein del sjølv òg, som ikkje er rekna inn i kostnadene, seier Raknes.

– Kvifor har de berre leigt ut fem av leilegheitene, og ikkje sju, slik det står i avtalen?

– Me har tilsette som bur i dei to siste, seier Raknes.

Kva som skjer når leigeavtalen går ut 30. september, er førebels uvisst.

Eit sal i kjømda

I mai opplyste rådmannen – etter at Frp hadde purra på sal av heimen – at planen var å selja eigedomen i august i år. Det vart ikkje noko av, men det betyr ikkje at heradet ikkje har arbeidd med saka. Rykkje opplyser at Strandebarm aldersheim er registrert som eigar av ein av eigedomane, og at dette må ordnast opp i for å få tinglysinga godkjend.

Det vart jobba med å få i orden tinglysinga også i 2011, men då kom ein ikkje lenger, seier Rykkje. Denne gongen vart det funne ein møteprotokoll frå 1959, som heradet håpar kan vera dokumentasjon nok.

Så snart dokumentasjonen er godkjend, vert det teke kontakt med eigedomsmeklarar, seier Rykkje. Når eigedomen eventuelt vert seld, håpar Raknes at kjøparane vil halda fram med å tilby overnatting. Trongen er der, meiner han.

– Er det aktuelt for dykk å kjøpa?

– Både ja og nei. Me har ikkje kapital nok sjølve, og eg trur me skal konsentrera oss om det me held på med, men saman med andre kan det vera aktuelt, seier Raknes.