Legg til rette for ein aktiv sommar

I tillegg til utsal i butikken tilbyr verksemda utleige av kajakkar, kanoar og SUP-brett. Vangen vonar at flest mogleg vil nytta seg av tilbodet, som ifylgje han kan gjera det lettare for dei som ynskjer å ha ein aktiv sommar.

– Viss folk er på ferie, er det veldig greitt å kunna leiga ein kajakk eller kano i staden for å ha med eigen, seier han.

Hotell tek ansvar

Dagleg leiar Bjørnar Vangen i Yamaha Hardanger AS, far til Tobias, fortel at verksemda leiger ut sjøsportsutstyret fordi ho ynskjer å gje folk moglegheita til å koma tettare på naturen langs fjorden.

Verksemda samarbeider med Hardangerfjord Hotel i Øystese, der utstyret står plassert.

I år er det andre året hotellet har dette ansvaret, fortel hotelldirektør Tanja Borge. Ifylgje henne er det fleire som har nytta seg av moglegheita til å leiga utstyret. Dei fleste av dei er gjester eller tilreisande. Borge understrekar at tilbodet er ope også for lokale.

Fleire av dei som leiger sjøsportsutstyret, har kjennskap til bruken av det frå før, fortel Borge. Samstundes påpeikar ho at det ikkje er naudsynt med erfaring. Mellom anna er det mange som kjem og prøver SUP-brett for fyrste gong.

Trør seg fram

Sjølve utleigeordninga byrja Yamaha Hardanger med for tre år sidan. Då hadde verksemda ein trøbåt som var tilgjengeleg i Norheimsund. På grunn av dårleg marknadsføring var det få som visste om tilbodet, fortel Bjørnar Vangen.

– Det stod berre informasjon på båten. Då var det Håkon V som tok seg av utleiga, seier han.

Trøbåten har ikkje vorte sjøsett i år. Ifylgje Vangen var plassen der han låg i fjor så vêrutsett at han nesten vart øydelagd. Han vonar å finna ein ny plass å ha båten.