– Legg oss ikkje heilt flate
Rådmannen og Helsedirektoratet meiner ubetent alkoholsal er ulovleg. Politikarane synest det er greitt, sidan andre har godkjent ordninga.
Formannskapet sa onsdag samrøystes ja til ubetent alkoholsal i daglegvarebutikken Herand Handel AS driv i Herand.
Rådmannen har tidlegare i år avslege søknaden utan å spørja dei folkevalde, og meiner han har fagleg støtte frå Helsedirektoratet. Direktoratet meiner nemleg at ubetent sal ikkje gjev god nok kontroll med salet.
Ut på tur
Det er Jørund Kvestad (Sp) usamd i. Han har vore i Herand på synfaring, og meiner verksemda har løysingar som sikrar god kontroll. Skjenkjekontrollen har ikkje hatt merknader til ordninga, påpeika han. Dessutan er salet til gagn for butikken, sa Kvestad.
Andre kommunar, til dømes Eidfjord og Samnanger, har ifylgje rådmannen delt ut tilsvarande løyve.
– Kva vurderingar andre kommunar har gjort, kan ikkje rådmannen svara for, heiter det i saksutgreiinga.
Herand Handel klaga på det administrative avslaget. Rådmannen avviste klagen, og saka ventar framleis på avgjerd hjå Statsforvaltaren. Sidan har ordførar Roald Aga Haug (Ap) blanda seg inn og bede rådmannen om å leggja fram søknaden for formannskapet. Trygve Bolstad (Ap) meiner det er god grunn til å utfordra Statsforvaltaren med eit positivt politisk vedtak i staden for å leggja seg heilt flat.
Trekkja klage?
Rådmannen skriv at saka kanskje burde ha vore lagd fram politisk i fyrste runde, men viser til at han altså meinte at det ikkje var opning i regelverket for ubetent alkoholsal.
– Om formannskapet gjer om rådmannen sitt vedtak, må klagaren vurdera om klagen til Statsforvaltaren skal trekkjast, skriv rådmannen.
Han rådde dei folkevalde til å avslå søknaden, men la òg fram eit etter hans syn ulovleg alternativ som innebar godkjenning. Det vart altså føretrekt.
HF har spurt rådmannen om ordføraren på eiga hand kan tinga politiske saker, som i dette tilfellet. Rådmann Ole-Jørgen Jondahl finn ikkje føringar på feltet i kommunelova eller det politiske reglementet, men opplyser at praksis har vore at ordføraren og utvalsleiarane har kunna tinga saker. Vel å merka kunne formannskapet ha valt å avvisa den aktuelle saka.
