Legg opp til lausdrift
Bonde Håvard Mykletun Vik i Strandebarm skal byggja om ein eksisterande driftsbygning til lausdrift.
Kostnaden på 550.000 kroner er fordelt på 2023 og 2024. Vik har søkt kraftfondet i Kvam herad om 225.000 kroner i stønad til prosjektet. Resten av kostnaden betalar han sjølv.
Vik kjøpte garden i Tordalsvegen i 2017, og har sidan jobba målretta med å byggja opp ein buskap med ammekyr av rasen Charolais, skriv han.
Det er no tid for å byggja om driftsbygningen for å forenkla drifta, få plass til fleire årskyr og stetta krava frå styresmaktene om lausdrift.
Ny innreiing i floren vil i fyrste omgang gje plass til 19 årskyr, men med gode moglegheiter for å utvida, opplyser Vik.
På lang sikt har han planar om å ta igjen slakt frå slakteri og ta hand om foredling av kjøt for direktesal. Med kontroll på heile verdikjeda vil Vik få auka nettoomsetning per individ til slakt og betre resultat på botnlina.
Prosjektet vil òg vera del av Vik si kompetanseheving som entreprenør og betongarbeidar, og gjera det mogleg å ta oppdrag av same slag, skriv han.
