Legg kulturhuset på is
Acos Invest AS gjev førebels opp planane om å reisa eit kultursenter ved Akkjerhaugen.
Det har styret i verksemda avgjort, i kjølvatnet av innvendingar frå Statsforvaltaren til reguleringsplanen for området.
Bakgrunnen er at verksemda er usikker på korleis ho «skal forhalda seg til samarbeidspartnaren vår, Ullensvang kommune». Acos Invest viser til at kommunen har kome med innspel om den estetiske utforminga, bruksområdet og materialvalet, og konstaterer at dette vert eit langdrygt og svært dyrt prosjekt. Uvissa gjer det tryggast å stoppa prosjektet no, heiter det i eit brev til kommunen.
Verksemda viser til avtalen med Jondal kommune frå 2018 om bygging av eit badehus. Avtalen inneber at huset skal vera tilgjengeleg for ålmenta og at driftskostnadene skal delast. I ettertid oppheva Statsforvaltaren det kommunale dispensasjonsvedtaket om huset, og viste til at avtalen ikkje sikrar interessene til ålmenta godt nok.
— Acos Invest er ikkje van med at underteikna avtalar vert brotne av styresmaktene, og me er skeptiske til å halda fram med prosjektet dersom dette er vanleg kutyme, skriv verksemda.
Ho skriv at det er trist at ho ikkje vågar å satsa meir etter bygginga av hotellet, men er open for å drøfta med kommunen kva ein kan gjera for å føra planane vidare.
I brevet frå kommunen i februar vert tiltakshavaren oppmoda om å greia ut strandsona, landskapet, kulturmiljøet og fortidsminne grundigare. Ålmenta må i større grad sikrast tilgang til friområdet og badehuset, utforming og byggjehøgd må konkretiserast, trongen for erosjonssikring bør granskast av konsulentar, og den gamle verkstaden må rivast før ny utbygging, ifylgje innspelet.
HF har bede rådmannen om kommentarar til brevet frå tiltakshavaren, men har ikkje fått tilbakemelding så langt.
