– Lat Tørvikbygd leva!
Pensjonistforbundet i Tørvikbygd meiner tilbod som barneskule, SFO og barnehage er avgjerande for å gjera bygda attraktiv for unge familiar.
Det kjem fram i ein uttale til Kvam herad i samband med saka om ei eventuell nedlegging av Tørvikbygd skule.
Ei nedlegging kan føra til at fleire vel å flytta vekk, noko som kan gjera Tørvikbygd til ei bygd for eldre, skriv forbundet.
Bygda er i vekst, står det i skrivet. Utvidinga av Hardingsmolt er nemnd, og det same er nytt byggjefelt, motocrossbane, skytebane, auka ferjetrafikk og arbeid med å etablera ny butikk.
Når sentrumsskulane allereie er overfylte, er det ifylgje Pensjonistforbundet uheldig å leggja ned det dei meiner er eit fungerande tilbod. Skulen i Tørvikbygd bør bevarast, og bygginga av ny barneskule i Øystese bør utsetjast til heradet har kontroll på utgiftene, skriv dei.
– Lat Tørvikbygd leva! står det avslutningsvis.
Forbundet oppmodar også om å skjerma helsesektoren frå dei føreslåtte kutta i Kvam, då dette vil gå hardt ut over eldre sine tenester.
