– Lasta ned overgrepsmateriale
Då politiet skulle pågripa ein mann i Kvam, skal han ha vore i ferd med å lasta ned overgrepsmateriale til datamaskina.
Det kjem fram i ei tiltaleavgjerd frå politimeisteren i Vest.
Over ein periode på fire år og ni månader skal mannen gjentekne gongar ha gjort seg kjend med eller delt bilete og film av seksuelle overgrep mot born, born i seksuelle positurar og animerte, seksualiserte bilete av born.
På digitale einingar hjå mannen er det funne til saman minst 162.000 filmar og bilete. Nokre av dei same filene kan ha lege på fleire einingar, står det i tiltaleavgjerda.
Då kvemmingen fyrst vart pågripen på nyåret i fjor, skal datamaskina hans ha vore i ferd med å lasta ned 305 filer med overgrepsmateriale. Materialet skal ha omfatta både filmar og bilete av overgrep mot jenter og gutar frå om lag eitt år og oppover.
Før jul i fjor vart mannen pågripen på nytt. Då skal det igjen ha vorte funne overgrepsmateriale, og igjen skal ei datamaskin ha lasta ned meir. På maskina vart det ifylgje tiltaleavgjerda funne 3.919 filer med overgrepsmateriale.
Advokat Thomas Nikolai Skeie Nondal er forsvarar for mannen. Han ynskjer ikkje å kommentera tiltaleavgjerda.
Saka skal opp i Hordaland tingrett i slutten av april.
