Lanserer ny traséidé
Trygve Baggegård Myrlid meiner han kan ha funne på ei skånsam løysing for kraftlina i Jondal.
Han meiner at hans alternativ kan vera så mykje som ei mil kortare enn lina Statnett SF prioriterer. Det går fram av eit høyringsinnspel i saka om oppgradering av kraftlina mellom Blåfalli i Kvinnherad og Samnanger.
Framlegget frå jondølingen går ut på å leggja lina parallelt med den gamle traseen frå Belsnes til Daurmålsdalen. Så kan lina gå vidare i kabel gjennom ein 2,5 kilometer lang tunnel til Flatabødalen. Gjennom Flatabødalen til Nordrepollen føreslår han luftleidning.
Han meiner alternativet vil vera gunstig med tanke på økonomi, praktisk arbeid og vedlikehald. I tillegg vil det gje monaleg mindre inngrep i naturen og skåna fleire støls- og turområde. Dessutan vil ikkje alternativet nå høgare enn 700 meter over havet, slik at det ikkje skulle vera så sterkt utsett for ising, skriv Myrlid.
Han har forhøyrt seg og konkludert med at det skal vera mogeleg å få til overgangane mellom luftline og kabel i tunnelen utan altfor dyre løysingar. Myrlid meiner tida er inne for å vurdera å gå frå prinsippet om å krevja svært tungtvegande årsaker for å velja kabel i staden for luftspenn for nett med spenning på 420 kilovolt.
