Langtur med promille endar i fengsel
— Stygge forbikøyringar og høg fart, slår retten fast.
Ein vossing i 40-åra er dømd til fengsel i 24 dagar og 5.000 kroner i bot etter å ha køyrt bil frå Voss til Jondal med høg promille, utan sertifikat og med påverknad frå hasj sundag 17. oktober i fjor. Han mistar dessutan retten til å ha førarkort i 27 månader.
Blodprøven som vart teken etter den nær ti mil lange turen med ein passasjer i bilen, synte ein alkoholkonsentrasjon på 1,68 promille i blodet. Nivået sette sine spor undervegs på ferda; eit vitne som såg mannen setja seg i bilen etter eit stopp i Skipadalen, reagerte på framtoningen og såg sidan at mannen køyrde fort og gjennomførte fleire farlege forbikøyringar mellom Norheimsund og Tørvikbygd. Også vitneobservasjonar på jondalsferja tilseier at mannen var tydeleg rusa.
Observasjonane vart solid underbygde av at mannen tilstod syndene utan atterhald i Hordaland tingrett. Der fortalde han i tillegg at han har røykt hasj lenge.
Mannen bad om fengsel på vilkår, men retten utelukkar ei så mild straff etter køyring med så heftig promille. Retten legg vekt på den lange strekkja mannen la bak seg, den store farten og dei stygge forbikøyringane. Alt i alt utgjorde han stor fare både for seg sjølv, passasjeren og andre, slår retten fast i domen.
