Lakseprisen stuper: – Alvorleg

Kiloprisen for laks har falle med 25 prosent – frå 74,8 kroner til 56,1 kroner – sidan slutten av februar, ifølge Fish Pool ASA, som er eigt av Oslo Børs ASA.

Prisen er venta å halda fram med å falla fram til september.

Etterspurnaden etter laks søkk, og verksemdene har vanskar med å selja til både Asia og Europa, fortel Kristian Botnen, dagleg leiar i Lingalaks AS.

– Me tapar pengar for kvar kilo me sel. Det kan verta betydelege beløp i ein periode framover, seier han.

Færre et laks

Lingalaks har for tida lite slakt. Mars er den dårlegaste vekstmånaden for oppdrettarane, med lågare temperatur i sjøen. Lingalaks har ikkje mykje fisk som skal slaktast fram mot sommaren, og er slik sett heldig, seier Botnen.

Sjølv i krisetider treng folk mat, men færre unner seg laks, trur Botnen. Restaurant- og hotellbransjen i både Noreg og utlandet har slutta å kjøpa. Fleire personar kjøper matvarer som held seg lenge, og mindre ferskvare vert omsett.

– Folk avgrensar seg no. Mange har mista jobben og har mindre å rutta med. Laks er ikkje ei luksusvare, men er dyrare enn ein del annan mat, seier Botnen.

Lingalaks har teke grep for å kutta kostnader og sikra tilstrekkeleg likviditet. Men den høgaste kostnaden verksemda har, er fôr, og fisken treng framleis mat. Endringar i valutakursane kan få stor påverknad på råstoffprisen.

To permitterte

– Situasjonen er veldig alvorleg, både for oss og for bransjen. 2020 vert eit dårleg år for heile næringa, seier Botnen.

– Men me er ikkje dei som vert hardast råka, så me kan ikkje klaga så mykje.

Verksemda har permittert to av 46 tilsette. Nokre tilsette er dessutan i karantene.

Situasjonen er nok meir prekær for andre verksemder i bransjen, til dømes innan slakt, sørvis, brønnbåt og eksport, seier Botnen.

Lingalaks vil prøva å halda oppe produksjonen. Næringa arbeider politisk for aksept for å ha meir fisk ståande i sjøen enn kva ein i utgangspunktet har lov til, viss det vert utfordrande å få omsett eller slakta fisken.

Botnen håpar òg på tiltakspakkar frå regjeringa som stimulerer på rett måte.

– Noreg er avhengig av skatteinntekter, og ein stor del av dei kjem frå det private. Inntektene til staten vil gå kraftig ned viss næringslivet går ned, seier han.