Laksemilliardær flyttar frå Bjørnafjorden for å spare skatt

Skatteparadiset Bø i Vesterålen får ein ny laksemilliardær på skattelista. Håkon Tombre, som eig laksekonsernet Tombre Gruppa, melder flytting frå Eikelandsosen i Bjørnafjord kommune.

Det er dei nye skattereglane for laksekonsesjonar som er bakgrunnen for flyttinga, ifølgje Vesterålen Online. Saka er også omtalt i E24.

– Alternativet er å selje bedrifta eller å gå på børs. Det er per i dag ikkje aktuelt, seier Tombre til Vesterålen Online. Han og kona Tone Tombre flyttar difor til kommunen som lokkar med lågare formuesskatt.

Om lag 20 personar har meldt flytting til Bø etter at kommunen vedtok å kutte den kommunale formuesskatten, skreiv NRK i desember. Mellom dei er oppdrettsgiganten Ola Braanaas, som har bygd opp Firda Seafood i Gulen ytst i Sognefjorden.

Oppdrettarane har protestert kraftig mot dei nye reglane, som opphavleg vart foreslått av Solberg-regjeringa og vart vidareført av den nye regjeringa i budsjettforliket.

(©NPK)