Låglandsløypa på Kvamskogen vert stadig lengre

Det seier leiar i Kvamskogen vel, Rune Hansen. Saman med Kvamskogen Næringslag er velet godt i gang med planlegging og utbygging av turløypenettet på Kvamskogen. Dersom alt går etter planen, er vona at ei ti kilometer lang turløype, også kalla låglandsløype, skal stå klar i 2024.

Tryggare og betre tilbod

Ifylgje Hansen er løypa eit etterlengta tilbod. Han meiner at sjølv om det er mange flotte turmål og løyper i området, er det ikkje like enkelt for alle å nytta desse.

– Det manglar gode stiar nede i hyttefelta. Ei låglandsløype vil syrgja for at endå fleire kan koma seg ut i terrenget, seier han.

I tillegg skal fleire ha etterlyst eit trygt tilbod for born og unge, der dei skal kunna gå og sykla utan å ferdast på trafikkerte vegar, hevdar Hansen.

Tore Thorstenson har hatt hytte på Kvamskogen sidan 1976. Han er svært positiv til utbygginga, og vonar at det vil verta lettare å ferdast til fots i myrlendte område.

– Det har vore snakk om dette prosjektet i mange år. Det er fantastisk at dei no er i gang! seier Thorstenson.

Vinn-vinn-prosjekt

Utbyggingsprosjektet vart sett i gang i 2020, og det meste av løypa vert bygd på regulerte skiløyper, forklarar leiaren i velet. Planen er å knyta saman eksisterande vegar med nye løyper, slik at ein kan koma seg frå Tokagjel til Teigaberg i Eikedalen.

Forbetringa av løypenettet vil ikkje berre gjera området meir tilgjengeleg for turgåarar. Dei om lag 1,5 meter breie løypene er planerte og drenerte, slik at løypemaskina får betre underlag. Det vil vera ein stor fordel om vinteren, meiner Hansen.

– Store myrområde fører til at det krevst ein del snø før maskina kan setja i gang med løypeprepareringa. No kan ein koma i gang mykje tidlegare i sesongen, fortel han.

Den austlege delen av løypa, frå Byrkjesetervegen til Kvinnhovden og Kvamskogen Landhandleri, er ferdigstilt. No er entreprenør Henrik Steine AS i gang med strekkja frå landhandelen til Leitet.

Treng støtte

Velet er i gang med prosjektering og finansiering av strekkja Leitet–Teigaberg, fortel Hansen. Dersom alt går etter planen, vil arbeidet starta våren 2023.

Utbyggingsprosjektet har ei total kostnadsramme på 2,4 millionar kroner. Til no har det vorte samla inn kring 1,7 millionar kroner, mellom anna frå det kommunale kraftfondet, Sparebankstiftinga i Hardanger, Kvamskogen Næringslag og Kvamskogen vel. Velet har i år sett av ytterlegare 170.000 kroner til prosjektet, opplyser styreleiaren.

For å koma i mål med finansieringa av prosjektet, oppmodar velet hytteeigarar til å melda seg inn i velet for å styrkja finansieringsmoglegheitene. Det er også oppretta ein innsamlingsaksjon gjennom Spleis, der ein kan gje pengar til områda ein ynskjer å støtta.

– Det er viktig at flest mogleg bidreg for at me skal få dette til, understrekar han.

På strekkja mellom Byrkjesetervegen og Kvinnhovden vart det samla inn 83.000 kroner. Strekninga frå Kvamskogen Landhandleri til Leitet vil kosta om lag 670.000 kroner, ifylgje Hansen. Han vonar Spleis-bidraga vil koma på om lag 100.000 kroner.