Låglandsløypa har vorte lengre
Turløypa frå Tokagjelet til Teigaberg kan verta ferdig i løpet av 2024. Ei ny bru vert kanskje ein bøyg.
Målet med løypa er at det skal vera mogleg å gå på ei skikkeleg turløype over heile Kvamskogen. Prosjektet er eit samarbeid mellom Kvamskogen Vel og Kvamskogen Næringslag.
Allereie i fjor haust var løypa frå Tokagjelet til Leitet klar. I år har ein av praktiske årsaker ikkje halde fram med å laga løype frå Leitet, men i staden laga sti i eit område midt mellom Leitet og Teigaberg.
Treng bru
– Årsaka er at dette var det enklaste å gjera med dei pengane me hadde i 2023. Dette er mellom anna fordi me vil laga ei ny bru ved Måvotno, fortel Henrik Steine, leiar i Kvamskogen Næringslag.
Brua skal vera mellom fire og fem meter lang, og skal vera brei nok til at løypemaskina kan køyra over den.
– Brua skal gå over ein bekk som ligg like ved Måvotno-stølen. Bekken vert full av is og slaps om vinteren og våren. Ekspertar som har sett på dette, meiner det er betre å byggja bru enn å leggja bekken i røyr, seier Steine.
Ifølgje Edvard Skagen, leiar i Kvamskogen Vel, vil brua truleg kosta om lag 650.000 kroner.
– Me må grava djupt i pengepungen for å få råd til ei bru, men om me ikkje byggjer brua, må turgåarane gå i terrenget eit stykke. Det vil ikkje vera mogleg å køyra barnevogn frå Tokagjelet til Teigaberg, slik me ønskjer, seier Skagen.
I tillegg til å byggja nye 650 meter med tursti har næringslaget og velforeininga sett opp 16 skilt langs den delen av turløypa som er ferdig. Kvart skilt har kosta 8.500 kroner. Kvamskogen Vel har kjøpt skilta, og Kvamskogen Næringslag har sett dei på plass.
Manglar 1,4 millionar
Arbeidet med turløypa vart sett i gang i november 2020. Når løypa er ferdig, vert den om lag ni kilometer lang. Ifølgje Steine og Skagen står det no om lag to kilometer att. Den ferdige turløypa vil truleg kosta om lag 3,8 millionar kroner.
Steine og Skagen trur det som står att, vil kosta om lag 1,4 millionar kroner. Ikkje ei einaste krone er på plass i skrivande stund. Arbeidet så langt er gjort med bidrag frå Kvam herad, ulike stiftingar og fond, lokalt næringsliv, såkalla spleisar, og næringslaget sine eigne pengar. Resten av arbeidet skal finansierast på same måte.
– Velforeininga kan finansiera litt av arbeidet, men langt frå alt, seier Skagen.
Kvam herad gav byggjeløyve for strekninga frå Leitet til Teigaberg i fjor. Løyvet varer i tre år. Steine og Skagen håpar at løypa skal verta heilt ferdig i 2024, men ser ikkje på det som ein katastrofe om tiltaket ikkje vert klar før 2025. Etter det må det søkjast om nytt løyve.
– Nytt løyve reknar eg med at me får, men det kostar litt å få eit løyve, og det vil vera bortkasta pengar, seier Steine.
– Eg er utolmodig som type, eg håpar at me vert ferdige med heile strekket til neste år. Eg vil påstå at dette er eit viktig prosjekt for infrastrukturen på Kvamskogen, seier Skagen.
