– Lågare grense er ikkje naudsynt

Det opplyser Vestland fylkeskommune i eit brev til bebuar Geir Stalheim.

Strekkja på fylkesveg 5099 er om lag 3,5 kilometer lang. Stalheim syner i eit innspel til at det er mange hytter og hus i området, og at det i helger og feriar kan vera mange born og vaksne som går opp og ned til fjorden og nausta på staden. Han skriv at det dagleg vert gått og sykla på vegen, utan at det er lagt til rette med fortau eller sikring. Det er ein del avkøyrsler på strekkja, og det er dårleg sikt i ein kurve. Stalheim meiner difor at fartsgrensa bør reduserast til 50.

Fylkeskommunen viser på si side til at trafikantane sjølve må visa omsyn, aktsemd og varsemd innanfor dei to generelle fartsgrensene ein har i Noreg: 50 og 80 kilometer i timen.

Fartsgrensene vert vurderte etter kriteria til Vegdirektoratet. Dei finst i eitt sett for tettbygde strøk og eitt for område utanfor tettbygde strøk. Dei baserer seg på mellom anna aktivitet på og ved vegen, busetnad, tal avkøyrslar og kryss, registrerte ulukker og nærleik til skular.

Strekkja på Kysnesstrand ligg utanfor tettbygd strøk. Vegen har ein låg årsdøgntrafikk på 100, med ti prosent lange køyretøy. Det er ingen registrerte ulukker på strekkja dei siste ti åra, og det er ingen skular langs vegen.

Vestland fylkeskommune har hatt to fartsmålingar i nærleiken, den eine ved hyttefeltet på Årvikeneset og den andre ved hyttefeltet på Sveo. Ved Årvikeneset viser 85 prosentsfraktilen – den farten som 85 prosent av køyretøya ikkje overskrid – at farten er 70 kilometer i timen, og ved Sveo er talet 59 kilometer i timen. Det er i hovudsak lokale bebuarar og hyttefolk som køyer på den nemnde vegen.

Fylkeskommunen meiner at ingen av faktorane som talar for 50-grense, er til stades i stor grad. Etter ei samla vurdering er det heller ikkje aktuelt med 60-grense.

Av målingane som er utførte, ser ein at farten ved Sveo ligg lågare enn 60. Han er truleg endå lågare inne i Årvika, der busetnaden ligg nærare vegen, skriv fylket.