Laga nye turkart til turistar

Kvam herad engasjerte Hallvard Bjørgum og Kjersti Byrkjeland ved turistinformasjonen for å laga karta. Karta vart ferdige i slutten av juni, og ligg på turistkontoret ved Steinsdalsfossen. Kvar sommar er rundt 30.000 personar innom kontoret.

– I fjor var det veldig stor etterspurnad etter korte turar, men me hadde få kart, fortel Bjørgum.

Han er dagleg leiar i Gullsmed Bjørgum AS, som driv turistinformasjonen i Kvam. Saman med Byrkjeland, som er kontorleiar, har han plukka ut ti turar. Dei har valt ruter som er lette å finna fram til.

– Det er viktig med ei god forklaring på kvar turen startar. Det er ofte nøkkelen til at folk kjem seg ut, seier Bjørgum.

Tungvint kopiering

Målgruppa er tilreisande som ikkje er fjellvande. Ifølgje Bjørgum er det mange som vil ha kart også rundt Movatnet, for dei vil ikkje gå feil. Ein del turistar kjem frå storbyar og urbane miljø. For dei er det ei stor oppleving å kunna gå ein runde i fred og ro.

– Mange kjem tilbake til turistkontoret etter turen. Dei får gjerne meirsmak og vil gå ei ny rute, seier Bjørgum.

Tidlegare år har det vore dårleg med kart over turar i nærområdet. Byrkjeland fortel at dei har hatt ei turbok for Hardanger liggjande på turistkontoret.

– Folk vil som regel ha éin eller to turar, ikkje ei heil bok. Me vart ståande og kopiera karta, seier ho.

Mobilfri oppleving

Heller ikkje mobilen er svaret for alle. Ofte vert det dyrt for utlendingar dersom dei må nytta internett og GPS på heile turen. I tillegg er nettstader som ut.no stort sett skrivne på norsk.

– For nordmenn er det lett å bruka mobil. Folk frå andre land er ikkje like vande med å orientera seg slik i terrenget, seier Bjørgum.

Norske stiar er heller ikkje så godt skilta samanlikna med utanlandske. Nordmenn forstår som regel kor ein skal gå ut frå til dømes gras som er trakka ned. Turistar er gjerne vande med sherpatrapper og skilt rundt kvar sving.

– Turistar kan fort få litt panikk om dei ikkje ser tydeleg kvar dei skal gå, fortel Byrkjeland.

Gode tilbakemeldingar

Karta har vorte godt mottekne. Elena Haug arbeider på turistkontoret i sommar. Ifølgje henne er turkart ofte det fyrste turistane etterlyser når dei kjem innom.

– Folk vil gå på tur uansett korleis vêret er. Det er imponerande! seier Haug.

Folk i alle aldrar og nasjonalitetar ynskjer å oppleva meir av den norske naturen. Ein familie med ei to år gamal jente og bestemor på 80 fekk kartet til Movatnet.

– Alle var begeistra for å gå på tur, fortel Haug.

Ifølgje henne er Krokavatnet og Fitjadalen populære turar. Dei ligg ikkje så langt frå fossen, og dei er overkomelege å gå. Haug fortel at mange jaktar på god utsikt over Hardangerfjorden og spør om det finst eit tårn i nærleiken. Men kva skal ein med tårn når det er fjell overalt?

– Turane viser fram den spektakulære norske naturen. Ein kan oppleva både skog, fjord og fjell, seier Haug.

Karta er skrivne på både engelsk og tysk. Dei inneheld informasjon om parkering, bompengar, lengd og tidsbruk. Kvart kart har eit bilete som viser høgdepunktet på turen, i tillegg til korleis parkeringsplassen ser ut. Turane er delte inn i tre nivå: lett, medium og utfordrande. Karta er finansierte av Kvam herad.