Lærte om framande land

Det var stor stemning i Sjydnahaugen barnehage onsdag 8. mars. I tillegg til born og tilsette hadde mange foreldre og andre slektningar funne vegen til barnehagen for å oppleva Forut-festen.

Festen markerte slutten på årets «Forut Barneaksjonen», som den norske bistandsorganisasjonen Forut står bak. Årets aksjon har fått tittelen «Biswas og de magiske fjella». Hovudpersonen er Biswas, ein gut som bur i Nepal.

«Forut Barneaksjonen» er både ein innsamlingsaksjon og eit pedagogisk opplegg som skal gje barnehageborn innsikt i andre kulturar.

– Alle hjelper til

For å skaffa inntekter til aksjonen, vart det selt saft, kaker, lodd og brukte ytterklede. Kleda var leverte inn av foreldra, medan born og tilsette i barnehagen sjølve hadde bakt kakene. Inntektene går til ulike føremål i Nepal, fortel pedagogisk leiar Ramiza Krdzalic.

– Alle borna har vore med på førebuingane. Sjølv dei aller minste hjelpte til på sin måte. Ein skulle kanskje tru at det er freistande å eta opp baksten, men borna var stolte av det dei hadde laga, og hadde veldig lyst til å visa det fram. Det var faktisk ingen som spurde om å få smaka, seier ho.

Ho fortel at barnehagen har vore med på barneaksjonen i mange år, og det er ikkje første gong borna har fått høyra om Biswas. Første gong var barnehagen fem år gamal. No er han 13.

Pedagogisk opplegg

Krdzalic fortel at Forut leverer både filmar, bilete, musikk, forteljingar og aktivitetar som skal gjera borna kjende med andre kulturar.

– Mellom anna hadde me ei dramatisering der med flaug til Nepal og var på safari. Borna fekk sjå løver, krokodillar og til og med ein yeti, seier ho.

Borna har òg smaka mat frå Nepal. Den vart laga av ein reinhaldar i barnehagen som kjem frå Nepal.

– På menyen stod linsestuing, gryterett og ris. Nokre av dei eldste borna fekk hjelpa til med å kutta grønsaker, fortel Krdzalic.

– Det er lov å vera ulike

Barnehagen har skaffa inntekter gjennom sal av kaker og lodd i ei årrekkje. Sal av brukte klede er nytt i år.

– Dette fordi me ønskjer å ha fokus på gjenbruk. Det står i rammeplanen at borna skal bli kjende med kva me kan gjera for miljøet, seier Krdzalic.

Sjydnahaugen barnehage har ifølgje Krdzalic born frå mange ulike kulturar.

– Me tykkjer det er viktig at borna våre vert kjende med ulike kulturar, og me ønskjer å skapa ei kjensle av samhald. Borna skal kjenna at det er lov å vera ulike, seier ho.

Til saman samla barnhagen inn 5.177 kroner.