Lærte om berekraft og filmproduksjon
Ei berekraftsveke kan handla om så mangt. For fem elevar frå Kvam ungdomsskule handla den om å laga film.
Førre veke stod berekraft på programmet til elevane på 9. trinn på skulen. Elisabet Aarekol er avdelingsleiar på 9. trinn. Ho fortel at skulen har arrangert berekraftsveker som eit prosjekt på 9. trinn i ei årrekkje. Innhaldet har variert frå år til år. I år bestemde skulen seg for å prøva noko nytt. Skulen arrangerte ekskursjonar til små og store lokale verksemder, og elevane fekk sjølve velja kva verksemder dei ville vitja.
– For oss har det vore viktig å gje elevane større valfridom. Me vil at elevane skal få vitja verksemder dei tykkjer er interessante. Desse verksemdene kan trass alt verta arbeidsplassane til elevane i framtida, seier Aarekol.
Valfridomen førte til meir arbeid for dei tilsette.
– Når så mange elevar skal på ekskursjonar, vert det meir planlegging. Samarbeidet med verksemdene har heldigvis vore veldig bra. Mitt inntrykk er at verksemdene har teke imot elevane på ein positiv måte, seier Aarekol.
Unge filmskaparar
Fredag kulminerte berekraftsveka med at elevane presenterte det dei hadde lært til kvarandre og til foreldra. Dei fleste gruppene hadde laga plakatar eller Powerpoint-presentasjonar, men éi gruppe skilde seg ut. Elevane i gruppa hadde vitja Hardanger fartøyvernsenter. Der hadde dei laga ein videofilm. Filmen hadde tittelen «5 ting du ikkje visste om fartøyvernsenteret».
– Filmen handlar om fakta som mange ikkje veit om fartøyvernsenteret, ting som kanskje er litt «fun facts». I tillegg handlar filmen om berekraft. Fartøyvernsenteret fiksar gamle båtar, slik at dei kan brukast om att, fortel Tuva Bystøl Børve, ein av filmskaparane.
– I tillegg lagar dei tau som ikkje inneheld plast, slik at det går i oppløysing av seg sjølv og er naturvennleg, seier ein annan filmskapar, Åsa Aalvik.
– Me lærte også kor flinke dei tilsette på senteret er til å bruka om att metall og tre, seier Alexander Nitter.
– Me har lært at det både er lurt, kjekt og nyttig å bruka ting om att. Det er lett å tenkja at ein berre må kjøpa nytt, seier Tuva.
– Humor og alvor
Dei brukte éin dag på å spela inn filmen og éin dag på å redigera. Opptaka og redigeringa vart gjort med hjelp frå Silje Ensby ved fartøyvernsenteret.
– Ho tok seg av filminga, men me fann på kva me skulle gjera i dei ulike klippa, fortel Tuva.
Filmskaparane er nøgde med den ferdige filmen.
– Filmen vart akkurat slik me ville at den skulle vera, seier Tuva.
– Den vart seriøs, men samstundes med hint av humor, seier Åsa.
Dei som vitja skulen fredag, slapp å gå svoltne heim. Det vart arrangert det skulen omtala som ein berekraftskafé i eit klasserom. Der vart kortreist mat, altså mat elevane sjølve hadde laga, servert.
