Lærte og hadde det kjekt
First Lego League-laget «Coder’s Fist» frå Norheimsund Friskule gjorde ein kjempeinnsats på fritida for å verta klare til konkurransen laurdag.
Det opplyser kontaktlærar for ungdomstrinnet, Kristin Vistvik, til HF. Ho har rettleia laget, som var sett saman av elevar frå 5. til 10. trinn. Korkje Vistvik eller elevane hadde vore med på konkurransen før, difor hadde dei ikkje så høge ambisjonar i år. Ei stund låg dei på 11.-plass av 24 lag i robotturneringa, men enda opp litt lengre nede på lista til slutt, fortel Vistvik.
Elevane har lært om hardangerjakta «Mathilde» og laga ein film om livet om bord på seglskuta i gamle dagar. Dei har arbeidd med prosjektet og trena robotar både i skuletimar og på ettermiddagstid i eit par månader.
– Eit viktig element i First Lego League er å ha det kjekt samstundes som ein lærer, og det har me fått til, opplyser Vistvik.
771 lag med over 10.000 born og unge frå Noreg og Sverige deltok i dei regionale finalane av tevlinga. Den regionale finalen fann stad i VilVite-senteret i Bergen laurdag.
