Lærte born om brann

Barnehagen fekk nemleg besøk av Svein Valland Laupsa. Han er varabrannsjef og leiar for brannførebyggjande avdeling i Kvam herad.

– Dersom det byrjar brenna, vert ein gjerne redd. Det første mange tenkjer når dei er redde, er å gøyma seg. Byrjar det brenna, må du ikkje gøyma deg i skapet eller under senga, men i staden koma deg ut av huset så fort du kan, sa Laupsa då han snakka til dei eldste borna i barnehagen.

Han fortalde òg kor viktig det er å ha ein røykvarslar som verkar, og synte korleis ein brukar brannsløkkingsapparat og brannteppe. Varabrannsjefen oppmoda borna om å sløkkja levande lys før ein forlèt eit rom, og vera nøye på å sløkkja bål i skog og mark.

Etter den teoretiske gjennomgangen venta rosina i brannpølsa: nærkontakt med ein av brannbilane til Kvam herad.

– Skulebesøk neste

Laupsa vitjar barnehagane i Kvam denne veka og neste veke. Seinare i haust står skulane for tur. I år er det sjetteklassingane som får besøk. Med seg på skulebesøka får Laupsa ein representant for Det lokale eltilsyn (DLE).

– Eg skal fokusera på brannvern, medan DLE fokuserer på el-tryggleik, altså kva ein kan gjera for å unngå brann i elektriske apparat. Til dømes vil dei snakka om kva som kan skje dersom ein søv medan ein ladar mobiltelefonen, seier Laupsa.

Brannbilen får stå i garasjen når varabrannsjefen er på skulebesøk. I staden skal elevane prøva å sløkkja ein brann med brannsløkkingsapparat.

– Me har ein hengar med eit kar der me tenner ein gassbrann. Brannen får elevane sløkkja med pulverapparat, fortel Laupsa.

Vil møta utsette grupper

Varabrannsjefen planlegg fleire møte med personar frå brannutsette grupper.

– Statistikken syner at om lag sytti prosent av dei som døyr i brannar i Noreg, anten er eldre og pleietrengande, personar med nedsett funksjonsevne eller personar som slit med rus eller psykiske lidingar, fortel han.

Planen er å skaffa seg taletid på naturlege møtepunkt for desse gruppene.

– Det kan til dømes vera på arrangement i regi av Grannehjelpa. Me ønskjer også å koma i kontakt med pårørande til eldre som framleis bur heime. Det er dei pårørande som kjenner desse best og som kan hjelpa dei med til dømes å sjekka at røykvarslaren, komfyrvakta og brannsløkkingsutstyret fungerer som det skal, seier varabrannsjefen.

Markerer brannvernveke

Den nasjonale brannvernveka går av stabelen neste veke. Barnehagebesøka vert ein del av denne.

Bak veka står Norsk Brannvernforeining, Direktoratet for samfunnstryggleik og beredskap og forsikringsselskapet If. Veka markerer starten på ei tid på året då talet på bustadbrannar aukar. Dette fordi me fyrer i omnane, brukar meir straum og tenner fleire levande lys, seier Laupsa.

Han håpar brannvernveka saman med dei andre vil setja brann og brannvern på dagsordenen.

– Når me formidlar kunnskapen til born og unge, håpar me dei skal formidla den i heimane. Til dømes kan borna minna foreldra på å sjekka om røykvarslaren fungerer og passa på at det er sløkkjeutstyr i heimane. Me oppmodar alle heimar i Kvam om å gjennomføra ei enkel brannøving i løpet av brannvernveka. Om ein øver, er ein betre førebudd dersom det byrjar brenna, seier Laupsa.

HF gjer merksam på at artikkelforfattaren leiger eit husvære av Svein Valland Laupsa. Red.