Lærarane må stilla seg i køen
Kven som helst har no høve til å møta opp og få koronavaksinen. Også pedagogisk personell må stilla seg i køen for å få siste dose.
Kommunane kan prioritera vaksinering av lærarar og barnehagetilsette etter at helsepersonell og risikogrupper er vaksinerte, opplyste Helse- og omsorgsdepartementet i slutten av juni.
Utspelet var etterlengta i Utdanningsforbundet, som har meint at deira medlemer er ekstra utsette i pandemien og difor bør prioriterast.
Ein prioriterte difor tidlegare i sommar lærarar og barnehagetilsette for påmelding til fyrste dose, med intensjon om at alle skulle vera verna før skulestart, seier informasjonsrådgjevar i Kvam herad, Øyvind Strømmen, til HF.
Alle i køen
No vert både fyrste og andre vaksinedose gjevne på drop-in-vaksinering, den andre viss det er gått meir enn fire veker sidan den fyrste.
Vaksinasjonen skjer i den tidlegare yrkesskulen i Steinsdalen onsdag 1. og torsdag 2. september. Sistnemnde dag vert det gjeve tilbod om stikk også på ettermiddagstid.
— Å seia at ei gruppe vert prioritert, er litt underleg, for kven som helst kan no gå og få vaksinen, seier Strømmen.
Over halvparten av dei tilsette i barnehagar og skular har no fått dose to av koronavaksinen, ifylgje regjeringen.no. Det er ein større del enn i folket generelt.
Må inn i køen
Kunnskaps- og integreringsminister Guri Melby (V) synest det er bra at så mange lærarar og barnehagetilsette ynskjer å ta vaksinen. Ho er glad for at mange kommunar har prioritert tilsette i barnehagar og skular også for dose to. No har ni av ti av desse fått fyrste dose, og halvparten har fått andre dose. Vaksinasjonen er viktig for at born og tilsette skal kunna få ein trygg kvardag, seier ministeren i ei pressemelding på regjeringen.no.
Strømmen seier at når det gjeld oppvekstsektoren, sa Folkehelseinstituttet i sommar at ein skulle prioritera lærarar og barnehagetilsette for å syrgja for at dei hadde fått fyrste dose minimum tre veker før skulestart. Det vart gjort. Dei som fekk fyrste dose, fekk ein avtale om andre dose litt fram i tid.
Elles gjeld det for desse, som for alle andre, at skal ein ta ein dose to før dette, så må ein bruka drop-in-moglegheita. Inntil vidare er det ikkje laga spesielle ordningar for det pedagogiske personellet.
Reknar med fleire høve
Rådgjevaren seier at det nok vert meir vaksinasjon, men han veit enno ikkje heilt korleis opplegget vert.
– Me reknar med at me skal kunna tilby vaksinar til alle som vil ha, men akkurat kor mange vaksinar me får levert, kor tid og ikkje minst kva type det vert, har me ikkje oversikt over, seier Strømmen.
Det er rikeleg med vaksinedosar. I veke 34 fekk Kvam ifylgje fordelingsplanen til Folkehelseinstituttet tildelt 1.656 dosar. I veke 35 skal heradet etter planen til FHI få 896 vaksinedosar.
Skular og barnehagar i Kvam er no på grønt nivå.
