La på sprang for ei god sak

Det opplyser ansvarleg for løpet, Anette Tyssebotn, som skipa det til saman med Marit Rogde. Det er i hovudsak dei to, som er tilsette i Hardanger Trening, som har leia Rosa sløyfe-løpet sidan det fyrst gjekk av stabelen for tre år sidan. Fleire andre tilsette og frivillige var vakter.

Løpet gjekk frå Hardanger Trening ved Spar til Blyberg i Vikøy og tilbake. Dei som ville, kunne snu på halvvegen. Lengda på løpet vart såleis anten tre eller seks kilometer. Deltakarane var i alderen 9 til over 70 år.

Den yngste deltakaren, Gustav Bergesen (9), kom òg fyrst i mål. Det vart ikkje lagt opp til nokon konkurranse, men niåringen var glad for plasseringa likevel, fortel Tyssebotn.

Det kom inn om lag 20.000 kroner i påmeldingsavgift. Kvar deltakar betala 300 kroner. Av dei går 50 kroner går til administrasjonsgebyr og resten til inntekt for Brystkreftforeininga.

Pengane går til forsking og betre medisinar mot brystkreft, og til vonleg ein dag å finna ein kur. Ein del av pengane går òg til pårørande og opptrening av dei som har hatt kreft og har vorte kreftfrie, fortel Tyssebotn.

– No har dette vorte ein tradisjon, så me håpar verkeleg at me klara å samla endå fleire neste år. Fyrste gongen, for tre år sidan, deltok over 200. Me jobbar kvart år for å slå den rekorden, seier Tyssebotn.

– Vert det nytt løp neste år?

– Ja, det vert det absolutt. Alle som deltok, var kjempenøgde og meiner det er eit godt og viktig arrangement. Me samlar både unge og eldre for ei sak som råkar svært mange, seier Tyssebotn.