La opp til omkamp om dobbeltrolle
Den nye opposisjonen ynskte ikkje å gje varaordførar Frode Nygård (Frp) roret i planutvalet. Maktkonsentrasjonen er uheldig, meiner partia.
Så seint som i vinter vart det bestemt av heradsstyret at ein frå og med denne valperioden skal gå tilbake til den gamle ordninga med automatisk dobbeltrolle. Berre MDG og H røysta for å lata det nye heradsstyret fritt peika ut leiaren.
Likevel tok Sp 17. oktober til orde for å droppa automatikken. Målet med framlegget var å spreia makta betre.
Gjermund Stuve (Sp) vedgjekk at også Sp stilte seg bak endringa i vinter, men opplyste at Sp sidan har innsett den tydelege maktkonsentrasjonen kring ordføraren og varaordføraren. Etter hans syn burde ein kanskje hatt endå eit utval, til dømes for helse og oppvekst, for å oppnå såkalla gjennomgåande representasjon. Det vil seia at alle i heradsstyret har fast plass i eit utval.
Kritisk til utsegn
MDG, H, SV og R stilte seg bak framlegget. Odd Valland Bovim (MDG) meiner det ikkje bør vera slik at det førre heradsstyret avgjer korleis det nye heradsstyret skal utføra arbeidet sitt.
– Ein ting er å ha og ynskja maktkonsentrasjon, ein annan å regelfesta at ein skal ha det. Ein kan røysta for framlegget frå Sp og deretter velja Nygård som leiar om ein ynskjer det, sa Bovim.
Administrativ rådgjevar Kari W. Vik tok ordet og sa at det ikkje var maktkonsentrasjon, men styrking av varaordførarposisjonen som var intensjonen til arbeidsgruppa som vurderte den politiske organiseringa.
– Eit utmerkt politisk innlegg. Eg er i tvil om administrasjonen bør ha slike innlegg, kontra Bovim.
– Det var ei oppklaring. Eg kan forsikra om at administrasjonen ikkje driv med politikk, men me opplyser når det er naudsynt, sa Vik.
– Veg tyngre
Håvard Gjerde (R) meiner poenget ikkje er kva intensjon arbeidsgruppa hadde, men den praktiske effekten av tiltaket. Ordførar Torgeir Næss (Ap) meiner endringa vil effektivisera varaordførarvervet, og minte om at ordninga har vore i bruk i Kvam før.
– Argumenta til opposisjonen er legitime, men omsynet til effektivitet og at det har fungert historisk, veg tyngre, sa han.
Dei 15 røystene til Ap, Frp, V og KrF sytte for at dobbeltrolla overlevde og at Nygård vart varaordførar. «Stillinga» hans er no på 40 prosent, og godtgjersla er 40 prosent av det ordføraren får. I tillegg kan han kjøpast fri tilsvarande inntil 20 prosent stilling til.
