Kystfiskarlaget meiner fiskerinæringa må få oppdrettsmillionar

Norges Kystfiskarlag meiner at midlane frå oppdrettsnæringa kan dekkje utbetring av fiskerihamner og lån til fartøykjøp.

Dette skriv Fiskeribladet.

Inntektene til kommunane frå oppdrettsnæringa blir fordelt gjennom eit havbruksfond, som vart oppretta i 2016. Målet med fondet er å stimulere kommunane til å leggje til rette for havbruksnæringa. No meiner styret i Norges Kystfiskarlag at fiskerinæringa må bli prioritert når desse midlane skal fordelast.

– Erfaring tilseier at desse midlane blir disponerte utan omsyn til kompensasjon for fiskeria, som er den mest skadelidande næringa som følgje av oppdrettsaktivitet, skriv styret i vedtaket sitt.