Kyrkjer kan måtte stengje på grunn av straumprisane

Meir enn 20 kyrkjelege fellesråd vurderer å stengje kyrkjene fordi straumprisane er så høge, skriv Dagen.

Avisa skriv vidare at nokre kyrkjer allereie har stengt dørene.

– Vi har ikkje eksakte tal på dette, men det er vel omtrent der landet ligg no. Mange fellesråd har sagt at dei er svært bekymra over situasjonen, seier spesialrådgivar Martin Stærk i KA, Arbeidsgiverorganisasjon for kirkelige virksomheter, til avisa.

Stærk seier vidare at fleire fellesråd har fått både dobling og fleirdobling av straumutgiftene, og at Kyrkja ikkje har pengar i bakhand til å takle krisa.

– Vi er nøydde til å lene oss på kommunane og staten her, seier han.

Blant tiltaka som kan innførast for å hjelpe på problema, er å flytte fleire aktivitetar til same dag, slik at ein slepp å varme opp kyrkja fleire gonger. Regjeringa foreslo like før månadsskiftet ei ekstraordinær straumstøtte på 30 millionar kroner for at kyrkjene ikkje skal måtte stengje i høgtida.

(©NPK)