Kyrkja klamrar seg til papiret
Kyrkjebladet vert truleg korkje digitalisert eller lagt ned.
Kyrkjeverje Olav Skeie Lid føreslår i staden status quo i ei sak til møtet i fellesrådet 6. november. Med eitt unntak: Annonseinntektene bør auka. Redaktøren – som i tillegg er annonseseljar og kyrkjeverje– må difor ut på turné, ifylgje framlegget.
Kyrkjebladet kjem i postkassane fire gonger i året, med ein kostnad på 210.000 kroner. Redaksjonsarbeidet kostar ingenting. Gåver finansierte 150.000 og lysingar 65.000 av den høge kostnaden.
– Bladet har lang «liggjetid» mange stader, og tilbakemeldingane på at bladet vert lese, er mange. Men det kjem også meldingar om irritasjon over at bladet dumpar ned i alle postkassar i Kvam, anten ein vil ha det eller ikkje, skriv Lid.
Han får ikkje løn utover kyrkjeverjeløna for redaktørjobben, som såleis ikkje er finansiert og har ein tendens til å verta ein salderingspost. Noka fast redaksjonsnemnd har ein heller ikkje lukkast med å danna.
Han viser til at mange kyrkjelydar kommuniserer digitalt, og skisserer nyhendebrev og ei rein nettside som alternativ, men konkluderer altså med at føremonene med papiret veg tyngst. Slik når utgjevaren fleire og får fleire utanfor «kjerne-kyrkjelyden» til å yta gåver.
– Kyrkjeverja har landa på at dagens fysiske kyrkjeblad si breie kontaktflate veg tyngst i møte med denne digitale endringstida me lever i. Inntil vidare tenkjer eg at bladet får ha den frekvens og det omfang det har i dag, skriv Lid.
