Kyrkja formidlar bodskapen på nett

Kyrkja i Kvam har spela inn gudstenester på video for fire høgtidsdagar i påsken, og Jondal kyrkje to.

Sokneprest Roar Strømme i Vikøy sokn står i ei snøfonn på Kvamskogen når HF ringjer.

– Video er det einaste høvet me har no når det er forbod mot å samlast, seier han.

– Det som er interessant, er at det er at det er svært mange som ser på.

Den første gudstenesta som vart spela inn i Kvam under koronakrisa, vart sett av litt fleire enn 700 personar medan ho låg ute. Den andre vart sett av om lag 450. Kyrkja har ein spesialavtale med rettsforvaltaren TONO om at ein kan ha opptak med musikk liggjande ute i inntil ei veke utan avgifter.

Tek lærdom

– Me må ta lærdom av situasjonen. Eg trur at me når me er over i normale tilstandar, kjem til å arbeida meir over nettet, seier Strømme.

Videooverføring erstattar ikkje det å koma i lag. Kontakten på nettet vert sett pris på. Det er kompletterande på mange måtar. Samstundes er det mange som gjev uttrykk for at dei saknar å koma saman.

– Det er krevjande å halda gravferder, ikkje minst sidan så få kan vera med, seier presten.

Smittevernstyresmaktene har sett ei grense på 20–25 deltakarar. I kyrkja må ein sitja med to meters avstand. Ein kan ikkje ha nærkontakt.

– Det er ei stor belasting for dei pårørande, som ville ha samla mange og vore nær kvarandre, bokstaveleg tala, seier Strømme.

Mykje videobasert

– Kva gjer prestane på i denne pandemi-tida?

– Det vert mykje å jobba på nett. Me produserer ting som me legg ut. Og så har me brålært å bruka Teams til jamlege møte med dei andre kyrkjeleg tilsette, sokneråda og fellesrådet.

Dei kyrkjeleg engasjerte kjem truleg til å ha fleire møte på nett når ting normaliserer seg, for å spara reising.

Når Strømme har nettgudstenester, prøver han å få dei til å ikkje berre handla om krisa. Prestane prøver å gje ei oppleving av ein viss normalitet. Ein tek situasjonen med i forbøna. Gudstenestene skal ikkje gje folk ei oppleving av krise, men av påskebodskapen på skjærtorsdag, langfredag og påskedag. Påsken i kyrkjeleg forstand er ikkje avlyst, seier Strømme. Kyrkja prøver å utvida perspektivet litt, og rettar merksemda mot dei som lever under langt meir krevjande tilhøve enn me gjer.

– For dei er dette ein total katastrofe, anten det er flyktningar eller fattige.

– Er koronakrisa ei straff frå Gud?

– Nei. At viruset spreier seg så fort har, seier ekspertane, har med internasjonaliseringa å gjera og at det er så mykje reising. På lang sikt trur eg pandemien vil endra mentaliteten vår, for me oppdagar kor sårbare me er. Det gjeld ikkje minst i vår del av verda, kor me trudde me hadde kontroll på det meste og at alt var trygt og sikkert. Alt gjekk opp og fram. Så, i løpet av ein dag eller to, kollapsar heile greia.

– Eksistensiell skaking

– Det vil vera annleis i andre delar av verda, der dei er vane med at livet er risikabelt og uføreseieleg. Mykje står på vent. Eg trur den eksistensielle skakinga vil nok vera sterkast i vår del av verda. Sjølv om krisa vil truleg råka hardast i den fattige delen av verda, viss ho verkeleg bryt laus i Afrika og Sør-Amerika.

Eg trur me kjem til å setja større pris på fellesskapen når krisa er over. Når me no vert sitjande innestengde, så oppdagar me kor mykje det tyder å kunna vera i lag. Heimekontor går an, men mange synest det vert trasig i lengda. Me treng rett og slett å vera i lag. Og så trur eg folk kjem til å setja større pris på det normale. Me vil ikkje gå med forventingar om at det skal skje noko ekstraordinært, flott og stort. Den alminnelege kvardagen er faktisk svært bra og verdfull. Me lengtar etter normaliteten.

– God kvalitet

Vidar Sangolt står for det tekniske i videostrøyminga. Han filmar på oppdrag frå Norheimsund og Øystese ungdomskor, som har utstyr til å både ta opp og redigera.

Han har laga til saman seks program. Sangolt brukar eitt «halvproft» kamera. Opplegget er svært enkelt, seier han.

– Me tek opp dei ulike delane og redigerer dei saman. Det er ikkje noko hokuspokus. Det kjem både musikalske innslag, og presten, som har resten. Det rima faktisk, seier han og ler.

– Me får sjå om det vert nye opptak etter påske. Det er moro å gjera noko ein ikkje driv med til vanleg, seier Sangolt.

Det har vorte god teknisk kvalitet på online-gudstenestene.

– Det er flott, seier Strømme.