Kvitt bel før raude grader

Både på Sjusete, Kvamskogen, Haukås og Vassenden er det denne veka køyrt opp skiløyper for dei som tykkjer vel om «bortoverski».

Tysdag fekk endeleg trakkemaskina på Sjusete i Kvam lufta seg att. Med 4. januar på kalenderen fekk ho røyna seg for andre gong så langt i sesongen.

Nytt oversyn

Leiar for Sjusete skisenter, Jan Tore Tveit, fortel at han er klar for ein ny sesong. Etter at det vart investert i ny trakkemaskin for to år sidan, er senteret inne i nokre år med mindre økonomisk handlingsrom, fortel han, men litt nytt kjem det likevel i vinter.

Tidlegare har skisenteret hatt eit løypekart på heimesida, men ingenting knytt til sjølve skisenteret. Kartet har vore sakna av tilreisande. No er nye tavler med oversikt over løypene klare.

— Det er vel helst for dei som ikkje er på Sjusete kvar veke. Det er ikkje alle som er like kjende. Og så kan det vera motiverande og kjekt for born å sjå kvar ein kan gå, seier Tveit.

På kartet er det oversikt over alle løypene med informasjon om høgdeprofil, lengd og bratte parti.

Også Nystøl-løypa er utbetra før sesongen. Løypa kom for tre år sidan, og litt og litt vert ho betra kvart år.

— I år har me mellom anna sprengt litt og lagt om traseen for å unngå at det vert for bratt rett etter Nystøl-vegen, fortel han.

Samstundes skryter han av velviljen frå grunneigarane. Utan hadde det vore vanskeleg å forbetra løypene.

— Er det andre prosjekt på gang?

— Det neste store prosjektet er vedlikehald av skihytta. Ho treng mellom anna nytt tak. Me har fått stønad som dekkjer halvparten av kostnadene, så me håpar å få starta til våren, seier Tveit.

Skisenteret ynskjer å byta ut lyskastarane. Straumrekningane i år er ekstreme, og med ledpærer vil det verta både betre lys og redusert forbruk.

Litt avventande

Kvam Langrenn og Skiskyttarklubb har Sjusete som heimebane. Klubbleiar Silje Laupsa Mo ser fram til at klubben kan trena på snø att, men i lys av den kraftige smitteauken i Noreg dei siste dagane er ho redd for å håpa på for mykje. Klubben samlar born og vaksne frå heile kommunen, og tek ingen sjansar.

— Me er forsiktige med å gå ut med datoar for serierenn, til dømes. Me lyt rett og slett finlesa restriksjonar og liknande. Noko er diffust og må sjekkast opp mot anna, og det kjem stadig endringar. Det er lett å gå i ei felle, seier Mo.

Ho fortel at skileik, skitrening og skiskyttartrening vil verta gjennomført slik retningslinene er i dag.

— Heldigvis er folk flinke til å snu seg rundt og stilla opp, seier Mo.

I eit styremøte måndag vil aktiviteten framover verta drøfta.

Opnar på Kvamskogen

Eikedalen Skisenter hadde ope i barneområdet i romjula, men elles har det vore dårleg med skimogelegheiter for dei som føretrekkjer snøbrett og alpinski under føtene. Til helga losnar det omsider, etter at det fall bortimot ein halv meter snø på Kvamskogen tysdag.

Både Furedalen Alpin og Eikedalen Skisenter opplyser at fleire skibakkar vert opna, avhengig av mellom anna kor mykje varsla snø som kjem fredag og kor mykje kunstsnø ein får produsert.

Aktiven Skiheis har opplyst på Facebook at skiheisane ikkje vil vera i drift i vinter. Lavvoen vil verta opna sporadisk dersom skjenkjeforbodet vert fjerna.

Skal ein lita på meteorologane, gjeld det å nytta på. Etter opphaldsvêr og blå grader i helga er det meldt kraftig regn og mange plussgrader – opp mot ti i låglandet – komande veke.