Kvit julemesse i Jondal
Då frivilligsentralen i Jondal inviterte til julemesse for første gong, sørgde vêret for at julestemninga vart komplett.
– Vêret kunne knapt vore betre. Det kunne ikkje vore meir julestemning enn det er her i dag, seier Christine Fauskanger Molven, dagleg leiar i Jondal Frivilligsentral.
Ho trur ikkje kulde og snø fekk potensielle kundar til å halda seg heime.
– No har det vore kaldt lenge. I dag er det faktisk mildt samanlikna med kva det har vore tidlegare. Det er glatt, men eg har prøvd å strø godt langs buene og der folk går. Eg trur folk toler at det kom litt meir snø i natt, seier ho.
– Vil skapa ny tradisjon
Ifølgje Molven er dette første gong sentralen inviterer til julemesse. Sjølv om sentralen er arrangør, har Molven fått god hjelp frå ein liten arrangementskomité.
– Dette er noko me bestemde oss for å starta fordi folk saknar Handverksmessa og landsbydagen. Me ønskjer å arrangera noko som kan skapa litt liv i sentrum. Fleire har spurt etter eit slikt arrangement, fortel ho.
Molven håpar at årets messe ikkje vert den første og einaste.
– Dersom interessa er til stades, ønskjer me å arrangera julemesse kvart år, seier ho.
12 utstillarar hadde meldt seg på. 11 av dei møtte opp. 5 av utstillarane hadde adresse i Jondal. Det vart selt alt frå matvarer og bruktgjenstandar til barneklede og ullprodukt.
Levande dyr
Gyrid Sollesnes hadde truleg den mest originale standen. Bak eit gjerde stod tre levande alpakkaer og togg. Dyra var med for å skapa litt blest om produkta ho selde, som var alle var laga av alpakkaull.
– Alpakkafiber er sju til ti gonger varmare enn saueull. Den er også allergivennleg og kan brukast av mange som får utslett av saueull. Eigentleg burde ein ha bytt ein del av sauene i Noreg ut med alpakkaer, seier ho.
