Kvinnherad vil kople seg på E39 med nytt bruprosjekt

Sunnhordland førebur seg til vegprosjektet Hordfast. No har Kvinnherad kommune fått Multiconsult til å greie ut kva det vil koste å kople seg på E39 når den nye vegen mellom Os og Stord står klar, skriv Bergens Tidende.

– Dagens situasjon er uhaldbar. Vi ønskjer eit ferjefritt alternativ, seier Hans Inge Myrvold (Sp), ordførar i Kvinnherad, til avisa.

Vegprosjektet dei no har planlagt er drygt 13 kilometer langt. Det startar på Tysnes, fortset vidare til øyane Skorpo og Huglo (i Stord kommune) og endar nokre få kilometer frå Husnes i Kvinnherad.

Tre bruer må byggjast. Den lengste av dei ei flytebru på mellom 3,5 og 4,0 km. Totalkostnaden er anslått til 6,6 milliardar kroner (ekskl.mva.), viser Multiconsults utgreiing.

Også Vestland fylkeskommune har engasjert seg i arbeidet. I eit brev til Samferdselsdepartementet ber dei om å få Sunnfast godkjent som eit ferjeavløysingsprosjekt.

Ferjesambandet mellom Stord og Kvinnherad har vore ein politisk verkebyll i Sunnhordland i mange år. I dag går ferja mellom Skjersholmane og Ranavik, ein solid omveg for det store fleirtalet som ferdast mellom dei to kommunane.

(©NPK)