Kvinne er sikta for både drapsforsøk, grovt skadeverk og brannstifting

Det kjem fram i ein orskurd etter eit lukka fengslingsmøte i Hordaland tingrett, opplyser politiadvokat og påtaleansvarleg Eli Valheim i Vest politidistrikt til HF fredag ettermiddag.

Kvinna, som framleis er lagd inn på Haukeland universitetssjukehus med skadar, er ifylgje Valheim sikta for både forsøk på drap, eldspåsetjing og grovt skadeverk i ein einebustad torsdag.

Politiet har ikkje hatt høve til å avhøyra henne. Dei kjem truleg til å be om ein såkalla judisiell observasjon av kvinna for å vurdera om ho er strafferettsleg tilrekneleg, opplyser Valheim.

Advokaten til kvinna, Kim Villanger, seier til HF at det på grunn av omstenda ikkje har vore mogeleg for han å drøfta saka med klienten. Han veit difor ikkje korleis ho stiller seg til siktinga og orskurden.

Den fornærma i saka er ein mann med ein relasjon til kvinna, opplyser Valheim. Mannen melde fyrst frå til politiet om at han skal ha vorte utsett for ei valdshandling frå hennar side. Sidan melde han frå om røykutvikling i bustaden. Politiet meiner at det er grunn til å tru at kvinna sjølv sette fyr på huset.

Mannen vart ifylgje politiadvokaten avhøyrd torsdag og vert avhøyrd igjen fredag. Han var lettare skadd og fekk behandling på legevakta etter hendinga. Han har fått oppnemnt Eirik Nåmdal som bistandsadvokat.

To krimteknikarar i politiet kom fredag ettermiddag til Norheimsund for å granska branntomta. Det vil verta peika ut ein brannsakkunnig i saka, opplyser Valheim til HF.