– Kvet norskopplæringa!
Kvam herad ville ha tent på ei intensiv og arbeidsretta norskopplæring, meiner Frp.
Gry Merethe Kyrkjeeide i Frp har bede rådmannen om å sjå nærare på kva det vil kosta å ha norskopplæring i Ålvik og Strandebarm. Det er bra at flyktningar vert busette i utkantane, men logistikken går ikkje opp, meiner ho.
Kyrkjeeide har òg bede rådmannen om å laga ei arbeidsgruppe som kan kvetja norskopplæringa mot arbeidslivet og behova i Kvam. I tillegg stilte ho spørsmål om kor mange av deltakarane som fullførte introduksjonsprogrammet i 2021 og 2022, som har kome seg i arbeid.
I eit førebels svar skriv rådmann Anita Hesthamar at spørsmåla tek tid å svara på. Rådmannen vurderer å ha temaa med i ei ny sak om busetjing av flyktningar i 2024.
Rådmannen har varsla ei eiga sak om ei eventuell endring i talet på flyktningar Kvam skal ta imot i 2024. Integrerings- og mangfaldsdirektoratet har oppmoda heradet om å ta imot 55. I budsjettet er det vedteke i busetja 30.
Etter ein gjennomgang av ressurssituasjonen skal rådmannen vurdera oppmodinga frå Imdi.
