Kvemmingen skal setja rekord til Sørpolen
Kan ein heiltent harding klara å gå 1.130 kilometer i 30–40 minusgrader på 21 dagar?
Det skal Arne-Kristian Teigland finna ut av i vinter. Han skal prøva å setja verdsrekord frå kysten av Antarktis til Sørpolen.
Ideen om rekordforsøket kom då han sist var på tur i Antarktis, for to år sidan, fortel Teigland.
– Då gjekk eg med ein kompis, og det var eit eventyr. Utruleg fint. Me var også einige begge to om at me hadde meir i oss, meir å gi.
Teigland bestemte seg derfor like godt for å prøva å ta rekorden.
På denne ruta ligg den førebels på 22 dagar. Teigland satsar på å bruke 21. Då må han i gjennomsnitt gå 54 kilometer kvar dag.
Frå 110 til 50 kilo
Det blir åleine, heilt utan hjelp. Og det vil verta ein ganske annleis tur, seier Teigland.
– Det er jo ein forskjell. No må eg dra på all vekt sjølv, og skjer det noko uventa, er eg meir sårbar.
Vekt er ein stor faktor på ein slik tur. Teigland har jobba mykje for å minska den mest mogleg.
Pulken veg no 50 kilo. Til samanlikning var pulken på førre tur 110 kilo.
Men 50 kilo er ikkje småtteri. Teigland har trent mykje den siste tida for å takla påkjenninga.
Særleg løpeturar med dekk hengande bak seg blir det mykje av. Fram og tilbake på Rallarvegen mellom Finse og Haugastøl.
– Mykje lang og seig trening. Det er for å forbereda kroppen på å bli broten ned over lengre tid, seier Teigland.
– Men det er perfekt for meg. Eg elskar det.
I tillegg har han terpa mykje på rutinar. Å setta opp telt, smelta snø, handsama ski, matlaging.
Alt må gjerast så effektivt som mogleg.
Sin eigen verste fiende
Det er ikkje alt ein polfarar kan styra.
– Når ein er midt oppe i det, åleine og utmatta i Antarktis, er det lett for at dei negative tankane kjem. Dei som fortel deg at «dette klarar du ikkje».
Då blir ein sin eigen verste fiende, seier Teigland.
– Ein kan prøva å vera så tøff som ein berre vil på førehand, men når dei tankane set i gang, må ein ha nokre verktøy klare.
For Teigland handlar det i stor grad om å halda på rutinane. Å vita at dette har han opplevd før, på lange pulkløp på Hardangervidda.
– Eg forventar at dei tankane kjem. Då må eg berre fokusera på å jobba meg sjølv opp.
Håper å møte Iron Maiden
Avreise er 25. november. Turen sørover går innom Chile, der Teigland tar seg tid til eit viktig stopp.
Kvemmingen er nemleg blodfan av metallbandet Iron Maiden, som skal halda konsert der.
Og det legendariske britiske metallbandet har fått med seg rekordforsøket.
– Dei er tydelegvis ein eventyrlysten gjeng sjølv, og eg håper på å få møtt dei før eg reiser vidare, seier Teigland.
