Kvemmingar nominerte til europeisk filmpris

Prix Europa er ein årleg festival og konkurranse for europeisk radio- og filmbransje. Førre veke vart festivalen arrangert i Berlin.

Tristan Holt, Cinna Longo, Karl Black og Isak Dominicus Ones har spela i serien laga av tv-skulen på Lillehammer ved Høgskulen i Innlandet. Ideen til «Gutta Allé» vart utvikla av studentar ved skulen på våren i fjor. På hausten vart han spela inn av heile årskullet for dokumentarstudentar.

– Dette er tv for ei ung målgruppe laga av dei som kjenner målgruppa best, seier førsteamanuensis Lasse Gallefoss til Høgskulen i Innlandet.

Gallefoss har vore hovudrettleiar. Han er stolt av det elevane har fått til.

– Å verta nominert til prisen er eit kvalitetsstempel. Det viser at me har utdanna studentar som held høgt, europeisk nivå, seier Gallefoss.

– Hardangerhumor

Det er sjeldan nokon frå Noreg er nominert til prisen, og det er fyrste gongen Lillehammer-skulen er nominert, ifylgje Gallefoss. I mediebransjen vert nominasjonar og prisar lagde merke til, seier Gallefoss. Han meiner kvemmingane skal ha sin del av æra for nominasjonen. Serien kjennest ekte fordi det ikkje er fire tilfeldige kjendisar som er sette saman, men ein venegjeng som har sin eigen måte å vera på, seier Gallefoss.

– Humoren vert «feelgood». Dei har ein hardangerhumor som er ertande og «understatementaktig». Når ein er gode vener, kan ein tøysa med kvarandre med stor kjærleik. Det fall tydelegvis i smak hjå den internasjonale juryen òg, seier Gallefoss.

Humor, openheita og sjarmen til gjengen er ein viktig del av suksessen, seier rettleiaren. Heile studentkullet «forelska» seg i kompisane, ifylgje Gallefoss, fordi dei bidrog med god stemning, godt arbeidsmiljø og godt læringsmiljø under innspelinga.

– Eg er sjeleglad for at det er akkurat desse gutane me laga serie om, seier han.

– Som ein idrettsutøvar

Serien handlar om ein kompisgjeng som skal visa korleis det er å vera ung mann i dag. Gutane budde saman på Lillehammer i ei veke. Kvar morgon fekk ein av gutane eit nytt oppdrag. Dette er klipt saman til fem episodar på om lag 15 minutt. Holt fekk ei oppgåve som handla om lytteevne, medan Ones vart utfordra på sjølvtillit.

– Me fekk utfordringar knytte til våre svake sider. Alt er ekte, og me fekk visa at ein kan vera sårbar sjølv om ein er mann, seier Holt.

Dokumentarstudentane oppdaga Holt i sosiale medium. Han hadde ein morosam profil, tonen og humoren var god og han «kom gjennom skjermen» i videoane han posta, seier Gallefoss. Holt takka ja til å vera med, men han ville ha med seg venene sine på innspelinga. Difor sende han ei liste over venegjengen sin til studentane, som plukka ut dei andre.

Holt er utdanna lydteknikar. Han har flytta til Oslo og prøver å laga seg ein karriere der han kan leva av å laga innhald til sosiale medium. Mellom anna har han ein podkast saman med Karl Black, som han hadde med seg i serien. Sjølv om han har laga mykje innhald til sosiale medium dei siste åra, var det annleis å spela inn serien, fortel han.

– Me fekk maten servert og det meste var planlagt. Eg kjende meg som ein idrettsutøvar som berre skulle prestera den konkrete tida, seier Holt.

– Ingen er perfekte

Holt synest det var gjevande å vera med i studentserien, sjølv om det vart lange dagar. Kvemmingane måtte stå opp klokka åtte, og innspelinga var ferdig klokka 21.

– Livet som skodespelar er hardt, men me slapp å bruka tid på å pugga manus sidan me berre skulle vera oss sjølve, seier Holt.

Han vonar publikum kan få tilgang til heile serien. Holt har prøvd å få serien selt til ulike mediehus, utan å lukkast. Han gjev ikkje opp.

– Eg har jævla lyst for å seia det mildt. Me får ikkje pengar for det. Men me har laga noko me er stolte av og trur andre kan ta lærdom av. Eg har veldig tru på serien, seier Holt.

Spesielt godt likar han episodane til Longo og Black. Målgruppa for serien er gutar i alderen 12–18 år.

– Me vil vera rollemodellar og visa at alle har sitt. Ingen er perfekte. Det er kjekt å fortelja litt av vår historie, seier Holt.

– Viktig å få innblikk

Episoden om Ones ligg ute på sida der nominasjonen er offentleggjord. Ones seier at han ikkje hadde erfaring med tv-produksjon, og synest det har vore ein lærerik prosess.

– Det er fint å visa fram korleis livet mitt er. Eg håpar at serien kjem ut og at han kan påverka mange unge menn, seier Ones.

Han trudde fyrst at han skulle spela ei rolle, og syntest det var litt merkeleg då han skjøna at han berre skulle vera seg sjølv.

– Eg er ein heilt vanleg norsk, ung mann. Me er ein heilt vanleg gutegjeng. Eg trur det er viktig at folk får innblikk i korleis livet faktisk er, seier Ones.

Han meiner at det er dei små tinga i livet som er viktige. Alle treng ikkje vera blant den eine prosenten som lukkast best, seier han. Serien er ikkje laga for å tena pengar, men for å treffa eit spesifikt publikum i håp om å betra menn si mentale helse, seier han. Om serien kjem ut, kan han kanskje hjelpa nokon tilbake på rett veg, seier Ones.

Det er svært spanande å verta nominert til Prix Europa Student Award, synest Ones, sjølv om han ikkje hadde høyrt om prisen før. Han håpar nominasjonen kan bidra til at nokon får lyst å kjøpa serien for å visa han fram.

– Det er skikkeleg tøft! Eg håpar me vinn, seier han.

Slik skulle det ikkje gå. Fredag 11. oktober vart det kjent at ein tysk produksjon stakk av med prisen.