Kvemming tek tak for Ukraina

Med seg på laget har kvemmingen fått Norges Fotballforbund og fotballpresident Lise Klaveness, som støttar aksjonen Fotball for Ukraina. Bakteppet er veterancupen i Sogn, som Flodsand har vore med på avvikla 24 gonger sidan 1998.

I vinter fekk han og medhjelparane i cupen på nokre månader ordna to ukrainske lag som deltok i cupen – eitt landslag og eitt klubblag. Under cupen gjekk startskotet for aksjonen, som berre den helga samla inn kring 700.000 kroner til humanitære føremål i krigsråka Ukraina.

Køyrde til Ukraina

Det stoppa ikkje der. Innsamlinga går føre seg enno. Flodsand fekk Helse Førde og administrerande direktør Arve Varden til å donera ein kassert ambulanse til aksjonen. Etter å ha sett han i stand, køyrde kvemmingen og pensjonert lege Geir Øverland – fast veterancuplege – denne veka bilen via Sverige og Polen til Lviv i Ukraina.

Fleire ambulansar skal kjøpast i og fraktast frå Nederland, fortel Flodsand. Ifylgje det han fekk vita då han var i Ukraina, vert kring tjue ambulansar øydelagde dagleg i krigen mot Russland.

Reisa til og frå Ukraina var av det litt strabasiøse slaget, i alle fall etter den symbolske nøkkeloverrekkinga i Oslo der Klaveness leverte bilnøkkelen til ein diplomatisk utsending frå Ukraina førre måndag. På grensa i Polen tok det si tid på båe sider, og spesielt velkomen kjende duoen frå Noreg seg ikkje, fortel Flodsand. Det tok heller ikkje lang tid før dei såg dei fyrste våpena i Ukraina, utan at det var nokon fare på ferde.

Bilen vart levert til kontakt og mangemillionær Oleh Sobutsky, som har vore visepresident i det ukrainske fotballforbundet og var med dei ukrainske laga til cupen i Sogn i januar. Han er attpåtil offiser i spesialstyrkane. Sidan sette Flodsand og Øverland seg på bussen tilbake til Warszawa, noko som tok si tid, før dei flaug tilbake via Oslo til Sogndal.

– Me møter ein utruleg positivitet til det me held på med, seier Flodsand.

Ein organisator

Flodsand kjem frå Norheimsund, men hamna i Sogn etter at han studerte i Sogn. Han bur i Lærdal og var tidlegare lærar, men har i mange år arbeidd for HSD og Tide i Norheimsund. Han har hus på Børvenes og pendlar, og arbeider for tida i halv stilling.

Han likar ikkje å skryta av seg sjølv og presiserer fleire gonger i intervjuet at han ikkje vil ha merksemd kring eigen person, men om hjelpeaksjonen.

Flodsand dristar seg likevel til å slå fast at han er god til å organisera og få ting til å skje, noko han har drive med heilt sidan han budde i Kvam og engasjerte seg i det som den gongen heitte NIL Fotball. Og med seg på «cuplaget» har han ei rekkje gode folk, presiserer han. Ein sentral filosofi er å plukka ut dei rette hjelparane.

– Eg vel dei som har mykje å gjera, for dei er effektive. Med dei som har god tid, vert gjerne ikkje så mykje gjort, seier han.

Kjem år etter år

Cupen i Sogn, som går føre seg både i Lærdal, Aurland og Årdal, har bygt seg gradvis opp, fyrst med norske og sidan engelske stjerner som trekkplaster attåt heilt vanlege, norske amatørveteranar. På det meste har 66 lag vore med på cupen. Han har etter kvart lært seg å delegera oppgåver.

Flodsand, som har etternamn etter bestefaren frå Namsos-området, seier mange har stilt spørsmålet om korleis ein fekk spelarar som Viv Anderson og Bryan Robson til ein avsidesliggjande stad som Lærdal. Trikset, røper han, var å gjera det gratis – med unntak for baren – å delta frå starten.

Sidan kom dei att og nye til, sjølv om det etter kvart vart berre transporten som var gratis. I tillegg har han vore medviten i arbeidet med å skaffa cupen merksemd i media.

– Det er veldig stas at folk synest det er kjekt. Men det er òg eg som må ta driten om det skulle vera noko, seier Flodsand, og minnest då han til dømes måtte kasta ut eit lag som laga bråk.

Cupen held koken og har utvida med både kvinneklassar og landslag, men snittalderen vert stadig høgare. Dei som var med frå starten, er i dag over 60. Ettersom fotballspelarane er aktive stadig lenger, er det dårleg med påfyll i den andre enden, fortel kvemmingen.

– Skal koma rett fram

Han kjenner etter mange års årlege treff fleire av dei gamle fotballstjernene personleg. Den rikhaldige kontaktlista på telefonen hans kjem til nytte rett som det er. Ikkje minst gjeld det i samband med innsamlingsaksjonen, der kjenning og tidlegare fotballproff Erik Nevland i Viking skaffa ein ukrainsk kontakt i Nederland som fekk fart på sakene.

A-landslaga har støtta arbeidet med 100.000 kroner gjennom Norske Idrettsutøveres Sentralorganisasjon (NISO) og uttrykt støtte til aksjonen. Det er symbolsk viktig, påpeikar Flodsand.

Alle innsamla midlar går til humanitære formål i Ukraina i samarbeid med norske hjelpeorganisasjonar som allereie er etablert i landet. Straumaggregat, mat og klede er døme på kva innsamla kroner vert nytta til.

– Me vil prøva å gjera mest mogeleg sjølv. Om me skal få glød i og fart på aksjonen, må folk vita at det kjem fram. Det er ingen mellommenn eller andre som tener pengar på dette, seier Flodsand.