– Kvar vert det av massane?

Som HF skreiv i januar, har tiltakshavar Hardanger Fishfarm fjerna det aller meste av den store fyllinga i sjøen i planframlegget som legg til rette for smoltanlegg ved Torsnes. Vona var at grepet skulle blidgjera Statsforvaltaren og få han til å trekkja motsegna.

I tilbakemeldinga påpeikar han at det er uklart korleis masseoverskotet skal handterast. I planframlegget er det opplyst at sprenging av fjellhallar kan frigje kring 750.000 kubikkmeter stein.

– Det er særs viktig at planar avklarar korleis overskotsmassane skal handterast og korleis dette skal fylgjast opp i planen. Det må gjerast ei konkret vurdering av om det er høve til gjenvinning av massar. Masseoverskot bør handterast i tråd med ressurspyramiden, skriv han, og ber kommunen klargjera saka før saka vert drøfta vidare.

I tillegg har han fleire spørsmål om den resterande fyllinga i det reviderte planframlegget. Om det finst ei visualisering av landskapet slik det vil sjå ut etter endringane i planen, ynskjer han å sjå denne.

Statsforvaltaren påpeikar at planen ikkje er i tråd med den gjeldande kommuneplanen, og at så store tiltak i utgangspunktet skal avklarast og greiast ut i den overordna planen. Ullensvang er i ferd med å laga ein ny plan.