– Kvar kjøper de olje?
2.337 kroner skal Kvam herad ha nytta på vedlikehald av ei gravemaskin i 2023.
– Kvar kjøper de olje?
Det spøsmålet stilte Arne Sandven (H) i arbeidsmøtet om budsjettet i formannskapet 20. november. Han undra seg over fleire summar som dukka opp i ei liste med alle kommunale maskiner i teknisk eining.
Til dømes synest han altså at det er rart at ei gravemaskin – ein minigravar av typen Cat 305.5 frå 2014 – kosta så lite i vedlikehald som 2.337 kroner i fjor. Året før skal vedlikehaldskostnaden, som ifylgje oversynet omfattar både delar og eigne arbeidstimar med vedlikehaldet, ha vore på 4.674 kroner.
– Svært lågt. Veldig mykje lågare enn det ein privat ville ha klara å gjera det for, kommenterte Sandven.
Rådmannen kunne fyrst ikkje gjera greia for detaljane, men viste til at tala stammar frå tilsette med god oversikt. Ho kom tilbake til saka seinare på dagen. Rådmannen sa seg då samd i at summane kunne verka litt låge, men påpeika at det kan skuldast at utgifter er førte på feil maskin. Det vil vera mykje arbeid å finna ut av det, ifylgje henne.
Det var Arne Sandven som tidlegare i haust fekk fleirtal for å be rådmannen leggja fram eit oversyn over alle maskiner i teknisk eining med ein innkjøpsverdi på over 100.000 kroner, med mellom anna driftstid, vedlikehaldskostnad og talet på timar tilsette har lånt maskinene i perioden 2022–2024. Reine driftskostnader er ikkje med. Tilleggsutstyr som snøfresar og kantklippar, og varebilar, tilhengarar og utrykkingskøyretøy er ikkje med på lista.
Lista fortel at det registrerte omfanget av utleige av maskinene til kommunalt tilsette skal vera svært lite. Mest utleigde var gravemaskina og hjullastaren i 2022, med høvesvis 19 og 17 timar.
Budsjettet og økonomiplanen vert handsama av heradsstyret torsdag 12. desember.
