Kvamsøy-oppdrett: — Sei ja, men krev nullvisjon!

Kort samanfatta er det innstillinga frå rådmannen når dei folkevalde skal uttala seg om søknaden om å ta i bruk akvakulturlokaliteten sør for Kvamsøy. Den endelege avgjerda skal fylkeskommunen ta.

Rådmannen rår dei folkevalde til å stilla krav om ein «nullvisjon for alle typar utslepp, så snart det er mogleg». Inntil det er mogeleg, bør ein krevja oppfylging og dokumentasjon av konsekvensane utsleppa har for korallar og blålange i området.

Om det vert avdekt negative fylgjer, må det medføra avbøtande tiltak, til dømes flytting av anlegget, tilrår rådmannen. Overvakinga bør gjerast i samarbeid med uavhengige forskingsinstitusjonar, meiner ho.

Visingssenteret ved anlegget bør ha «høg arkitektonisk kvalitet», ifylgje framlegget.

— Er avklara

Ho viser til at arealbruken vart avklara då heradsstyret i 2019 med ei overvekt på éi røyst vedtok å akseptera området AK27 på 100.000 rutemeter. Dermed meiner ho at alt ligg til rette for å gje Lingalaks AS grønt lys for eit anlegg med ein maksimal biomasse på 3.120 tonn, meiner ho. Biomassen skal flyttast frå lokalitetane Djupevik og Rossholmen.

— Det som står att, er å finna gode løysingar, der det vert arbeidd mot nullutslepp på flest mogeleg område, og som varetek raudlista artar av korallar og fisk i fjorden, skriv rådmannen.

Viser til ABO-utgreiing

Aksjonistane som demonstrerte mot AK27 i 2019, glimra med sitt fråvære då saka var på høyring i vår, men ei rekkje andre har sendt innspel.

Rådmannen svarar gjennomgåande på desse ved å visa til konsekvensutgreiinga som ABO Plan & Arkitektur AS utarbeidde for Kvam herad i kommuneplanprosessen. Ho minner om at overordna styresmakter aksepterte planen, og at vedtaket har vore til lovlegkontroll.

— Det er såleis brei semje om på regionalt nivå om at området kan nyttast til akvakultur, skriv ho.

Ymse innspel

Fleire, mellom andre Naturvernforbundet, har teke til orde for å sjå søknadene ved Kvamsøy og Mælen i samanheng. Rådmannen vil overlata dei samla vurderingane til overordna styresmakter, som Mattilsynet. Ho minner om at akvakulturområdet i Jondal allereie var godkjent då kommuneplanen for Kvam vart vedteken, og at det er om lag tre kilometer mellom anlegga.

Miljøvernforbundet hevdar at miljøgranskingane frå Lingalaks AS ikkje er til å lita på. Rådmannen er usamd. Fiskarlaget Vest meiner tre ankringspunkt må flyttast for å redusera ulempene for fisket. Rådmannen tilrår å krevja at dette vert vurdert.

Sverre A. Stakkestad peikar mellom anna på at arbeidsplassar i reiselivsnæringa er viktige, og at etableringane i Samlen-området vil råka desse. Rådmannen meiner arbeidsplassane i oppdrettsbransjen er like viktige.

Formannskapet drøftar saka 9. juni. Heradsstyret skal vedta fråsegna 15. juni.